އިހަވަންދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީއިން އިންތިޒާމްކޮށްގެން ކުރިޔަށްގެންދާ، ޑަބުލިއު.ޑީ.ސީ އަންހެން ވޮލީ ބޯޅަ މުބާރާތް 2024، ގެ ފައިނަލަށް ކުޑަކަތީބު މަގު ޓީމް ދަތުރު ކޮށްފިއެވެ. އެޓީމުން މިމުބާރާތުގެ ފައިނަލުން ސީދާ ޖާގައެއް ކަށަވަރުކުރީ ގްރޫޕް ސްޓޭޖްގައި ކުޅުނު ހުރިހާ މެޗަކުން މޮޅުވެ 9 ޕޮއިންޓާއި އެކު އެއްވަނަ ޓީމްގެ ގޮތުގައެވެ.
މިމުބާރާތުގެ ގްރޫޕް ސްޓޭޖް ލީގު އުސޫލުން ކުޅޭއިރު، އެންމެ ގިނައިން ޕޮއިން ހޯދާ ޓީމަށް ފައިނަލުން ސީދާ ޖާގައެއް ކަށަވަރު ވެއެވެ. އަދި ގްރޫޕްސްޓޭޖުން 2 ވަނަ އަދި 3 ވަނަ ހޯދާ ދެ ޓީމްގެ ސެމީފައިނަލަށް ދަތުރުކުރާނެއެވެ. އެގޮތުން ސެންސިޓީ 6 ޕޮއިންޓާއި އެކު ގްރޫޕް ސްޓޭޖްގެ ދެވަނަ ޓީމްގެ ގޮތުގައި ސެމީ ފައިނަލަށް ދަތުރުކޮށްފައިވާއިރު ބޮޑުމަގު ސެމީ ފައިނަލުން ޖާގައެއް ކަށަވަރުކުރީ 3 ޕޮއިންޓާއި އެކު 3 ވަނަ ޓީމްގެ ގޮތުގައެވެ. ގްރޫޕް ސްޓޭޖްގައި ކުޅުނު އެއްވެސް މެޗަކުން ޕޮއިންޓެއް ނުހޯދުނު ހޯރަފުށި ޓީމްވަނީ ކަޓައިފައެވެ.
މިމުބާރާތުގެ ސެމީފައިނަލް ކުޅޭނީ މިރެއެވެ. އިމަގު ވޮލީ ކޯޓްގައި ކުޅޭ އެމެޗް ފަށާނީ މިރޭ 20:15 ގައެވެ. މިމުބާރާތުގެ ޗެމްޕިއަން ޓީމަށް 15000ރ ގެ ފައިސާގެ އިނާމެއް ހުށަހަޅާފައިވާއިރު، ދެވަނަ ޓީމަށް 5000ރ ގެ ފައިސާގެ އިނާމެއް ހުށަހަޅާފައިވެއެވެ. މިމުބާރާތުގައި ވާދަކުރަނީ ހަތަރު ޓީމެކެވެ. އެއީ އެފްސީ ބޮޑުމަގު، ސެންސިޓީ، ކުޑަކަތީބު މަގު އަދި ހޯރަފުށީ ޑަބުލިއު.ޑީ.ސީއެވެ.
