އިހަވަންދޫގެ ސަރުކާރު އޮފީސްތަކާއި ކުންފުނިތަކުގެ މެދުގައިކުޅޭ އިންޓަރ އޮފީސް ފުޓްސަލް ޗެލެންޖް 2024، މިމަހުގެ 29 ވާ ހުކުރު ދުވަހުގެ ރޭ ފެށުމަށް ތައްޔާރުވެއްޖެއެވެ. އިހަވަންދޫ ކައުންސިލުން އިންތިޒާމް ކޮށްގެން ކުރިޔަށްގެންދާ މިމުބާރާތް މިބާއްވަނީ އެއް އަހަރުގެ މެދުކެނޑުމަކަށްފަހުއެވެ.
މިއީ މިމުބާރާތް ބާއްވާ 6 ވަނަ ފަހަރެވެ. މިމުބާރާތުގެ އެންމެ ކާމިޔާބު ޓީމަކީ އިހަވަންދޫ ފުލުހުންގެ ޓީމެވެ. އެޓީމް 3 ފަހަރު މިމުބާރާތް ކާމިޔާބު ކޮށްފައިވާއިރު، ފެނަކަ އިހަވަންދޫ ބުރާންޗުންވަނީ 2 ފަހަރު މިމުބާރާތް ކާމިޔާބު ކޮށްފައެވެ.
މިއަހަރުގެ މުބާރާތުގައި ޖުމްލަ 7 ޓީމަކުން ވާދަކުރެއެވެ. އެއީ އާރު.އާރު.ސީ، ފެނަކަ އިހަވަންދޫ ބްރާންޗް، ބީ.ބީ.ސީ.އެފް.އެމް ލިންކޭޖް، އާމިނާދިޔޯ ސިއްޙީމަރުކަޒު، އިހަވަންދޫ ސްކޫލް، އިހަވަންދޫ ކައުންސިލް އަދި އިހަވަންދޫ ޕޮލިސް ސްޓޭޝަނެވެ. މިއަހަރުގެ މުބާރާތް ކުރިޔަށް ގެންދަނީ ދެ ގްރޫޕަކަށް ބަހާލައިގެންނެވެ. ގްރޫޕް “އޭ” ގައި، އާރު.އާރު.ސީ، ފެނަކަ އިހަވަންދޫ ބްރާންޗް އަދި ބީ.ބީ.ސީ.އެފް.އެމް ލިންކޭޖް އޮތްއިރު، އާމިނާދިޔޯ ސިއްޙީމަރުކަޒު، އިހަވަންދޫ ސްކޫލް، އިހަވަންދޫ ކައުންސިލް އަދި އިހަވަންދޫ ޕޮލިސް ސްޓޭޝަން އޮތީ ގްރޫޕް “ބީ” ގައެވެ.
ކޮންމެ ގްރޫޕަކުންވެސް އެންމެގިނަ ޕޮއިންޓްހޯދާ ދެ ޓީމް ސެމީފައިނަލަށް ދަތުރުކުރާއިރު، މިމުބާރާތުގެ ފައިނަލް ކުޅޭނީ އަންނަ މަހުގެ 6 ވާ ހުކުރު ދުވަހުގެ ރޭ 20:00 ގައެވެ.
