ތިލަދުންމަތީ އުތުރުބުރީ އަތޮޅު ކައުންސިލުން އިންތިޒާމް ކޮށްގެން ކުރިއަށް ގެންދިޔަ “ތިލައުތުރު ރަންތާޖު ޤުރުއާން މުބާރާތް 2024” އިން 2 ވަނަ އިހަވަންދޫ ހޯދިއިރު، މުޅި މުބާރާތުން އެއްވަނަ އާމިނަތު ނަސްރަތު ހޯދައިފިއެވެ.
ހއ އަތޮޅުގެ 13 ރަށަކުން 134 ދަރިވަރުން ބައިވެރިވި މިމުބާރާތް ކުރިޔަށް ގެންގޮސްފައިވަނީ ހއ އުތީމްގައެވެ. އުތީމުގައި ހުންނަ ބޮޑުތަކުރުފާނުގެ ހަނދާނީ މަރުކަޒުގައި ކުރިޔަށްދިޔަ މިމުބާރާތުގެ ކިޔެވުން ކުރިޔަށް ދިޔައީ މިމަހުގެ 24 އިން 25 އަށެވެ. މިމުބާރާތުގެ އިނާމުދިނުމުގެ ރަސްމިއްޔާތު އޮތީ މިއަދުގެ ހެނދުނުއެވެ. މިއަދު ބޭއްވި އިނާމުދިނުމުގެ ރަސްމިއްޔާތު ޝަރަފްވެރިކޮށްދެއްވީ ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާއި ބެހޭ ވަޒީރު އޮނަރަބަލް އާދަމް ޝަރީފް ޢުމަރުއެވެ.
މި މުބާރާތަކީ ކީރިތި ޤުރްއާން ކިޔެވުމުގެ 37 ވަނަ ގައުމީ މުބާރާތަށް ހއ.އަތޮޅު ކައުންސިލް ތަމްސީލްކުރާނެ ބައިވެރިން ހޮވުމުގެ ބޭނުމުގައި އެ އަތޮޅުގެ ހުރިހާ ރަށަކަށް އަމާޒު ކުރެވިގެން އަތޮޅު ކައުންސިލުން ކޮންމެ އަހަރަކު ބާއްވަމުން އަންނަ މުބާރާތެކެވެ.
މި މުބާރާތް ކުރިއަށް ގެންދަނީ ރަށު ކައުންސިލްތަކުން އޮޑިޝަނެއް ނުވަތަ މުބާރާތެއް ބާއްވައި އެ އޮޑިޝަނުން ނުވަތަ މުބާރާތުން ހޮވިގެން އެ ރަށެއް ތަމްސީލުކުރާ ބައިވެރިންގެ މެދުގައެވެ. މިދިޔަ އަހަރުގެ ތިލައުތުރު ރަންތާޖު ޤުރްއާން މުބާރާތް ބާއްވާފައިވަނީ ހއ. މާރަންދޫގައެވެ. އެމުބާރާތުންވެސް އިހަވަންދޫ ދެވަނަ ހޯދިއިރު، އިހަވަންދޫ ސްކޫލްގެ ދަރިވަރު، ޔައިޝާ ޔާސިރު އިބްރާހިމް ވަނީ މުޅި މުބާރާތުން އެއްވަނަ ހޯދައިފައެވެ.
މިއަހަރުގެ ތިލައުތުރު ރަންތާޖު ޤުރުއާން މުބާރާތު 3 ވަނަ ރަށަކަށް ހޯރަފުށި ހޮވުނުއިރު ދެވަނަ ރަށަކަށް ހޮވުނީ އިހަވަންދޫއެވެ. މުޅި މުބާރާތުން އެއްވަނަ ރަށަށް ހޮވިފައިވަނީ ދިއްދޫއެވެ.
