ހއ. މުރައިދޫގައި ކުރިއަށްދާ “ތިލައުތުރު ވޮލީ މުބާރާތް – 2024” ގެ ސެމީފައިނަލް ފުރަތަމަ މެޗްގައި، މުރައިދޫ ބަލިކޮށް އިހަވަންދޫ މުބާރާތުގެ ފައިނަލަށް ދަތުރުކޮށްފިއެވެ. އިހަވަންދޫ ޓީމުން މިމެޗް ކާމިޔާބުކުރީ 3 ސެޓް 2 ސެޓްގެ ނަތީޖާއަކުންނެވެ.
ވާދަވެރި ހަމަހަމަ ރީތި ކުޅުމެއް ފެނިގެންދިޔަ މިމެޗްގެ ފުރަތަމަ ސެޓް އިހަވަންދޫ އިން ކާމިޔާބުކުރީ 25-19 އިންނެވެ. ބަދަލުގައި ޖެހިގެން އައި ދެ ސެޓް މުރައިދޫ ކާމިޔާބުކުރީ 25-21 އަދި 27-25 އިންނެވެ. ކުޅުން ރަނގަޅުކޮށް އިހަވަންދޫއިން ވަނީ ޖެހިގެން އައި ދެ ސެޓުން މޮޅުވެ މެޗް ކާމިޔާބު ކޮށްފައެވެ. އެ ދެ ސެޓް އިހަވަންދޫ ކާމިޔާބުކުރީ 25-23 އަދި 15-7 އިންނެވެ. މެޗްގެ މޮޅު ކުޅުންތެރިޔާއަށް ހޮވުނީ އިހަވަންދޫ ޓީމްގެ ޖާޒީ ނަންބަރު 12 އައިރީން އިބްރާހިމްއެވެ.
މިމުބާރާތުގައި ކުޅުން އެއްވެސް މެޗަކުން، މި ދެ ޓީމަކީ މިމެޗާއި ހަމަޔަށްވެސް އެއްވެސް ސެޓަކުން ބަލިނުވެ އޮތް ހަމައެކަނި ދެ ޓީމެވެ. ފަހަތުންއަރާ މޮޅުވުމުގެ ގިނަ ޗަރުކޭސްތަކެއް ފެނުނު މިމެޗުން ދެ ޓީމްގެ ކުޅުންތެރިންގެ ހުނަރު ފެނިގެން ދިޔައެވެ.
އިހަވަންދޫ މިމެޗުން މޮޅުވުމުން، މިމުބާރާތުގެ ފައިނަލުން ޖާގައެއް ކަށަވަރު ވެފައިވާއިރު، މުރައިދޫ ޖެހޭނީ ސެމީފައިނަލްގެ 3 ވަނަ މެޗްގައި ބައްދަލުކުރާށެވެ. މުރައިދޫއާ ދެކޮޅަށް ސެމީފައިނަލްގެ 3 ވަނަ މެޗްގައި ނުކުންނާނީ މިރޭކުޅޭ ސެމީ ފައިނަލްގެ 2 ވަނަ މެޗުން މޮޅުވާ ޓީމެކެވެ. ސެމީ ފައިނަލްގެ ދެވަނަ މެޗްގައި ބައްދަލުކުރާނީ ބާރަށް އަދި އުތީމެވެ.
މިމުބާރާތުގެ ސެމީ ފައިނަލްގެ 3 ވަނަ މެޗް ކުޅޭނީ މާދަމާ ހަވީރު 16:00 ގައެވެ. އަދި ފައިނަލް މެޗް ކުޅޭނީ ހޮނިހިރު ދުވަހުގެ ރޭ 20:00 ގައެވެ.
މި މުބާރާތް ފެށުނީ މި މަހުގެ 15 ވަނަ ދުވަހުއެވެ. އަދި ނިމޭނީ 23 ވަނަ ދުވަހުއެވެ. މުބާރާތުގައި ބައިވެރިވެފައިވަނީ 7 ޓީމެވެ. އެއީ މުރައިދޫ، އުތީމް، ކެލާ، ވަށަފަރު، އިހަވަންދޫ، ބާރަށް އަދި ދިއްދޫއެވެ. މުބާރާތް ކުރިއަށްދަނީ ދެ ގްރޫޕަކަށް ބަހާލައިގެންނެވެ.
މުބާރާތުގެ ޗެމްޕިއަން ޓީމަށް 20،000 ރުފިޔާ، ރަނަރަޕް ޓީމަށް 10،000 ރުފިޔާ އަދި ފެއަރ ޕްލޭ ޓީމަށް 5،000 ރުފިޔާގެ ފައިސާގެ އިނާމު ދިނުމަށް ވަނީ ހަމަޖެހިފައެވެ.
