އިހަވަންދޫ މަސްވެރިންގެ ގުޅުން (އިމަގު) ޖަމިއްޔާއިން ކޮންމެ އަހަރަކު ރަމްޟާން މަހާއި ދިމާކޮށް ބާއްވަމުން އަންނަ އަލްމަރުޙޫމް ޙުސައިން ޒުހައިރުގެ ހަނދާނީ 9 ވަނަ ޤުރުއާން މުބާރާތް ބާއްވައިފި އެވެ.
9 އަހަރުން ދަށުގެ ބަޔާއި 9 އަހަރުން މަތި އަދި ޚާއްޞަ އެހީއަށް ބޭނުންވާ ކުދިންގެ ބަޔާއެކު މައިގަނޑު 3 ކެޓަގަރީއަކަށް ބަހާލައިގެން ކުރިއަށް ގެންދިޔަ މިމުބާރާތުގެ ކިޔެވުން ކުރިއަށް ގެންގޮސްފައި ވަނީ މިމަހުގެ 19 އިން 20 އަށް އިހަވަންދޫ މަދަރުސާގެ ހޯލުގައެވެ.
އިމަގު ޖަމިއްޔާގެ މީޑިއާ ކޯޑިނޭޓަރ އަލްފާޟިލް ސައިފުﷲ އަޙުމަދު ރަޝީދު އިހަވަންދޫޑޮޓްކޮމް އަށް މަޢުލޫމާތު ދެއްވަމުން ހާމަކުރެއްވިގޮތުގައި މިއަހަރުގެ މުބާރާތުގައި ޖުމުލަ 139 ދަރިވަރުން ބައިވެރިވެފައި ވެއެވެ. އެއީ ނުބަލައި ކިޔެވުމުގެ ގޮފިން 53 ދަރިވަރުންނާއި ބަލައިގެން ކިޔެވުމުގެ ގޮފިން 85 ދަރިވަރުން ނެވެ. އަދި ޚާއްޞަ އެހީއަށް ބޭނުންވާ ކުދިންގެ ބައިގައި 1 ދަރިވަރަކު ބައިވެރިވެފައިވާ ކަންވެސް ސައިފުﷲ ފާހަގަ ކުރެއްވިއެވެ.
އަލްމަރުޙޫމް ޙުސައިން ޒުހައިރުގެ ހަނދާނީ 9 ވަނަ ޤުރުއާން މުބާރާތުގެ 9 އަހަރުން ދަށުގެ ބައިގެ ކިޔެވުމުގެ ފަނޑިޔާރުކަން ކޮށްދެއްވާފައި ވަނީ މުޙައްމަދު އިމްރާން، ޢަލީ މާހިރު އަދި ޝަހުލާ މުޙައްމަދު އެވެ. އަދި 9 އަހަރުން މަތީގެ އުމުރުފުރައިގެ ފަނޑިޔާރުކަން ކޮށްދެއްވާފައި ވަނީ މިރަމްޟާން މަހު އިހަވަންދޫގައި ތަރާވީޙް ނަމާދު ކުރުމަށް ޕާކިސްތާނުން ގެނެސްތިއްބެވި ހާފިޘުންގެ ތެރެއިން 2 ބޭފުޅަކާއި އަޙުމަދު ރަޝީދު އެވެ.
މިމުބާރާތުގެ ނަތީޖާ ފާޅުކުރުމުގެ ރަސްމިއްޔާތު އަވަސް މުއްދަތެއްގެ ތެރޭގައި ކުރުމަށް އިމަގުން މަސައްކަތް ކުރަމުންދާކަމަށް ސައިފުﷲ ހާމަކުރެއްވިއެވެ.
