ގޯލްޑެން ފުޓްސަލް ޗެލެންޖު 2025 ގައި ވާދަކުރާ އިހަވަންދޫ ފުޓްސަލް ޓީމްގެ ފުރަތަމަ މެޗް މިރޭ ކުޅޭނެއެވެ. މިރޭގެ މެޗްގައި އިހަވަންދޫ ނުކުންނާނީ، ހއ މުރައިދޫ ފުޓްސަލް ޓީމާއި ދެކޮޅަށެވެ.
އިހަވަންދޫ އަދި މުރައިދޫ ބައްދަލުކުރާ މެޗް ފެށުމަށް ހަމަޖެހިފައިވަނީ މިރޭ، 22:00 ގައެވެ. ހއ އަތޮޅު ބުރުގެ މެޗްތައް ކުރިޔަށް ގެންދަނީ ދެ ގްރޫޕަކަށް ބަހާލައިގެންނެވެ. އިހަވަންދޫ ހިމެނެނީ ގްރޫޕް ބީ ގައެވެ. ގްރޫޕް ބީގައި ހިމެނެނީ އިހަވަންދޫގެ އިތުރުން، މުރައިދޫ، ދިއްދޫ، ވަށަފަރު އަދި އުތީމެވެ. ގްރޫޕް އޭ ގައި ހިމެނެނީ ހޯރަފުށި، ބާރަށް، ކެލާ، މާރަންދޫ އަދި ފިއްލަދޫއެވެ. ކޮންމެ ގްރޫޕަކުންވެސް އެއްވަނަ އަދި ދެވަނަ ހޯދާ ދެ ޓީމް ސެމީ ފައިނަލަށް ދަތުރުކުރާނެއެވެ.
މިދިޔަ އަހަރުގެ މުބާރާތުން އިހަވަންދޫ އަލްވަދާއު ކިޔަންޖެހުނީ ހއ އަތޮޅު ބުރުގެ ކުއާޓަރ ފައިނަލްގައި އުތީމްއަތުން ބަލިވުމުންނެވެ.
