ހއ އަތޮޅުގެ ރަށްތަކަށް ހުޅުވާލައިގެން، ތިލަދުންމަތީ އުތުރުބުރީ އަތޮޅު ކައުންސިލުން ބާއްވާ ތިލައުތުރު ވޮލީ މުބާރާތުގައި ބައިވެރިވުމުގެ ފުރުސަތު ހުޅުވާލައިފިއެވެ. ހއ އަތޮޅުގެ ކޮންމެ ރަށަކުން 1 ޓީމަށް ބައިވެރިވެވޭ މިމުބާރާތުގެ ބައިވެރިވުމުގެ ސުންގަޑިއަކީ އަންނަ އޭޕްރީލް މަހުގެ 10 ވާ ބުރާސްފަތި ދުވަހުގެ 12:00 އެވެ. އަދި ޓީމް ލިސްޓް ހުށަހެޅުމުގެ ސުންގަޑިއަކީ 15 މެއި ވާ ބުރާސްފަތި ދުވަހުގެ 12:00 އެވެ.
ހއ އަތޮޅުކައުންސިލުން މިއަހަރުގެ ތިލައުތުރު ވޮލީ މުބާރާތް ހޯސްޓް ކުރާނެ ރަށެއް ހޯދުމަށް ހުޅުވައިލުމުން ޕްރޮޕޯސަލް ހުށަހެޅި ރަށު ކައުންސިލްތަކުގެ ތެރެއިން އެންމެ މަތިން މާކްސް ހޯދާ ޕްރޮޕޯސަލް ކާމިޔާބުކުރީ ހޯރަފުށި ކައުންސިލުންނެވެ. އެހެން ކަމުން މިއަހަރުގެ މުބާރާތް އޮންނާނީ ހޯރަފުށީގައެވެ. މިމުބާރާތް ފެށުމަށް ހަމަޖެހިފައިވަނީ މިއަހަރުގެ މެއި މަހުގެ 23 ވަނަ ދުވަހުއެވެ. މައުލޫމާތު ލިބިފައިވާގޮތުގައި މިއަހަރުގެ މުބާރާތް ހޯސްޓްކުރުމަށް ހޯރަފުށީގެ އިތުރުން، އިހަވަންދޫ އަދި މުރައިދޫ ކައުންސިލުންވެސް ޕްރޮޕޯސަލް ހުށަހެޅިއެވެ.
މިދިޔަ އަހަރުގެ ނޮވެމްބަރ މަހު ބޭއްވި ފުރަތަމަ ތިލައުތުރު ވޮލީ މުބާރާތް ހޯސްޓް ކޮށްފައިވަނީ މުރައިދޫ ކައުންސިލުންނެވެ. ފުރިހަމަ އިންތިޒާމްތަކަކާއިއެކު ކުރިޔަށްދިޔަ އެމުބާރާތުގެ ފައިނަލްގައި އިހަވަންދޫއާ ވާދަކޮށް މުބާރާތުގެ ޗެމްޕިއަންކަން ހޯދީ މުރައިދޫއެވެ. ތިލައުތުރު ވޮލީ މުބާރާތް 2024 ގައި ޖުމްލަ 7 ރަށަކުން ވާދަކުރިއެވެ. މިމުބާރާތުގެ ޗެމްޕިއަން ޓީމަށް 20،000ރ އަދި ރަނަރަޕް ޓީމަށް 10،000 ރުފިޔާގެ ފައިސާގެ އިނާމު ހުށަހަޅާފައިވެއެވެ.
