އިހަވަންދޫގައި ބަންނަމުންދާ ދޯންޏެއްގެ ކައިރީގައި އަލިފާން ރޯވެއްޖެ!

މުޙައްމަދު އަކުރަމް

އިހަވަންދޫގައި، ބަންނަމުންދާ ދޯންޏެއްގެ ކައިރީގައި އަލިފާނުގެ ހާދިސާއެއް ހިނގައިފިއެވެ. މިހާދިސާ ހިނގާފައިވަނީ މިއަދު ހަވީރު 16:45 ހާއިރުއެވެ.

އަލިފާން ރޯވެފައިވަނީ އިހަވަންދޫ އާރުޑީސީ ސައިޓާއި ދިމާލުން ދެކުނަށްހުރި ހަރުގޭގެ ކައިރީގައެވެ. ރޯވި އަލިފާން ގަނޑު ކޮންމެވެސް ވަރަކަށް ކައިރީގައިހުރި ހަރުގެތެރެއަށް ވަތްނަމަވެސް އެސަރަހައްދޔގައި ހަރަކާތްތެރިވި މީހުންވަނީ، ހަރުގެތެރެއަށް އަލިފާންފަނޑު ނުފެތުރެނީސް ނިއްވައިލާއިފައެވެ.

އަލިފާން ނިއްވުމުގައި ބޮޑަށް ހަރަކާތެރިވީ، މިރޭ ފަށާ އިމަގު ފަންސަތިރީސް ވެޓްރަންސް ފުޓްސަލް މުބާރާތަށް ދަނޑު ތައްޔާރުކުރަންތިބި މީހުންނެވެ. އެމަސައްކަތުގައި ހަރަކާތްތެރިވި މުހައްމަދު ރަޝީދުބުނީ އޭނާވެސް އެދިމާ ބަލައިލީ، ދުންއަރައިގެން ނުވާނެ ދިމާލަކުން ދުންއެރުމާއި މާބޮޑަށް އަލިފާން ހިފާއަޑު އިވެން ފެށުމުން ކަމުގައެވެ. “އަހަރެން އެތަނަށް ގޮސް ބަލައިލިއިރު އަލިފާންގަނޑު ފެތުރެނީ، އަވަހަށް އެހެން މީހުންނަށް ގޮވައިގެން ގެނެސް ނިއްވުމުގެ މަސައްކަތްކުރީ” މުހަމަދު ރަޝީދު ތަފްސީލް ކޮށްދިނެވެ.


އަލިފާން ނިއްވުމުގައި ހަރަކާތްތެރިވި ގިނަމީހުން  ބުނީ  އެއީ ބަޔަކު ގަސްތުގައި ކޮށްފައިހުރި ކަމެއްކަމަށް ނުބެލެވޭ ކަމުގައެވެ. “ބޮޑަށް ހީވަނީ މަދިރިޔަށް ދުންޖަހަން ރޯކޮށްފައިހުރި ޓައްޕެއް ވެއްޓުމުގެ ސަބަބުން ހިނގި ހާދިސާއެއްހެން” އެސަރަހައްދުގައި ހަރަކާތެރިވި މީހަކު ބުންޏެވެ.


އަލިފާން ރޯވި ސަރަހައްދަކީ އެތައް މިލިޔަން ރުފިޔާއެއްގެ އަގުހުރި  ގިނަ އަދަދެއްގެ ފައިބަރު ދޯނިތައް ބަންނަމުންދާ ސަރަހައްދެއް ނަމަވެސް، ވަރަށް ގޮނޑުކޮށް އިންތިޒާމެއްނެތި އޮންނަ ސަރަހައްދެކެވެ. ބޯކޮށް ވައު ހެދިފައި އޮންނައިރު ބައެއްކަހަލަ ނުރައްކާތެރި ކުނިބުނިވެސް އެސަރަހައްދަށް އުކާފައި ހުރެއެވެ. މަދިރީގެ އުނދަގުލުން ސަލާމަތްވުމަށް ދުންޖެހުމުގެ ގޮތުން ޓައްޕުތަކުގައި ރޯކޮށްފައި ބެހެއްޓުމަކީ ފައިބަރު މަސައްކަތްކުރާ  އިހަވަންދޫ މީހުންގެ މެދުގައި  ވަރަށް އާންމު ކަމެކެވެ.