އިހަވަންދޫ ކައުންސިލްގެ ރަސްތަރި ޤުރްއާން މުބާރާތް 2025، ގެ ގަދަ 05 ބައިވެރިން ހޮވައިފިއެވެ. މިމުބާރާތުގެ ތިންވަނަ ބުރަށް ދަތުރުކުރާ ގަދަ 5 ބައިވެރިން ހޮވީ، ޕޯލްސްޓާރ ހިޔާގައި މިރޭ ބޭއްވި، މިމުބާރާތުގެ ދެވަނަ ބުރުގެ ނަތީޖާ ފާޅުކުރުމުގެ ރަސްމިއްޔާތުގައެވެ.
މިމުބާރާތުގައި އިހަވަންދޫއާއި އެކު 7 ރަށަކުން ބައިވެރިވިއެވެ. އެ 7 ރަށުން 54 ބައިވެރިން މިމުބާރާތުގައި ކިޔެވިއެވެ. މިމުބާރާތް ކުރިޔަށް ގެންދާނީ ތިން ރައުންޑަކަށެވެ. ފުރަތަމަ ރައުންޑާއި ދެވަނަ ރައުންޑަކީ އެލިމިނޭޝަން ރައުންޑެވެ. ތިންވަނަ ރައުންޑަކީ ފައިނަލް ރައުންޑެވެ. ދެވަނަ ރައުންޑަށް ހޮވޭނީ ފުރަތަމަ ރައުންޑުން އެންމެ މަތިން މާކުސް ހޯދާ 10 ބައިވެރިންނެވެ. އަދި ފައިނަލް ރައުންޑަށް ހޮވޭނީ ދެވަނަ ރައުންޑުން އެންމެ މަތިން މާކުސް ހޯދާ 5 ބައިވެރިންނެވެ.
މިމުބާރާތުގެ ފުރަތަމަ އަދި ދެވަނަ ރައުންޑް މިހާރު ނިމިފައިވާއިރު، ތިންވަނަ ރައުންޑްގެ ކިޔެވުން ފަށާނީ މާދަމާ ހެނދުނު 10:00 ގައެވެ. މިމުބާރާތުގެތިންވަނަ ރައުންޑަށް ދަތުރުކުރި 5 ބައިވެރިންނަކީ:
މަރިޔަމް ހިބާ ހުސައިން / ވިގޯރަސް، ހއ. ދިއްދޫ
ޔައިޝާ ޔާސިރު އިބްރާހިމް / ދޭލިޔާގެ، ހއ. އިހަވަންދޫ
މަރިޔަމް މިދުހާ ހާޝިމް މުހައްމަދު / އަންބަރީގެ، ހއ. އިހަވަންދޫ
އައިޝަތު މައިހާ މާހިރު / ރަށްމެދުގެ، ހއ. އިހަވަންދޫ
އައިޝަތު ރީޝް ނަސީމް / ފިޔަނޫރުވިލާ، ހއ. ދިއްދޫ
މިއަހަރުގެ މުބާރާތުގެ އެއްވަނަ ބައިވެރިޔާއަށް ހުށަހަޅާފައިވަނީ އުމުރާ ދަތުރަކާއެކު 10,000 ރުފިޔާގެ ފައިސާގެ އިނާމެކެވެ. ދެވަނަ ބައިވެރިޔާއަށް 6,000 ރުފިޔާ އަދި ތިންވަނަ ބައިވެރިޔާއަށް 3,000 ރުފިޔާގެ ފައިސާގެ އިނާމު ހުށަހަޅާފައިވާއިރު، ރަށްރަށަށް ދޭ އިނާމުގެ ގޮތުގައި އެއްވަނަ ރަށަށް 10,000 ރުފިޔާ، ދެވަނަ ރަށަށް 7,000 ރުފިޔާ އަދި ތިންވަނަ ރަށަށް 5,000 ރުފިޔާގެ ފައިސާގެ އިނާމު ހުށަހަޅާފައިވެއެވެ.
މިމަހުގެ 27 ވަނަ ދުވަހުން ފެށިގެން މިމަހުގެ 29 އާއި ހަމަޔަށް ކުރިޔަށްދާ މިމުބާރާތް ބާއްވާ މިއީ 3 ވަނަ ފަހަރެވެ. . އެންމެ ފުރަތަމަ 2022 ވަނަ އަހަރު މިމުބާރާތް ބޭއްވީ “އިހަވަންދިއްޕޮޅު ރަސްތަރި މުބާރާތުގެ” ނަމުގައި މުޅި ހއ އަތޮޅަށް ހުޅުވާލައިގެންނެވެ. އެފަހަރުގެ މުބާރާތުގައި 8 ރަށަކުން ވާދަކުރިއެވެ. އެއަށްފަހު އެއްއަހަރުގެ މެދުކެނޑުމަކަށްފަހު މިދިޔަ އަހަރު މިމުބާރާތް ބޭއްވީ “ރަސްތަރި ޤުރުއާން މުބާރާތް 2024” ގެ ނަމުގައި އިހަވަންދޫއަށް ހުޅުވާލާއުގެންނެވެ. އެ ދެ މުބާރާތުގެވެސް އެއްވަނަ ހޯދީ އިހަވަންދޫ ދޭލިޔާގެ ޔައިޝާ ޔާސިރު އިބްރާހިމްއެވެ. ޔައިޝާ ވަނީ މިއަހަރުގެ މުބާރާތުގެވެސް ގަދަ 5 އަށް ދަތުރުކޮށްފައެވެ.
