މިއަހަރުގެ ރިޔާސީ އިންތިހާބުގައި ވާދަކުރައްވާ އެއް ކެންޑިޑޭޓުކަމަށްވާ ކުރީގެ ރައީސް ނަޝިދުގެ ރަނިންމޭޓު ޑރ. މުސްޠަފާ ލުތުފީ މިއަދު އިހަވަންދުއަށް ޒިޔާރަތް ކުރައްވައިފިއެވެ.
ޑރ. މުސްޠަފާގެ އަރިހުގައި އެމްޑީޕީގެ ޗެއަރޕާސަން ރީކޯ މޫސާ މަނިކާއި އެޕާޓީގެ ކުރީގެ ޗެއަރޕާސަން މާރިޔާ އަހުމަދު ދީދީ އާއި ކުރީގެ އެޑިއުކޭޝަން މިނިސްޓަރ ޝިފާ ބައިވެރިވެވަޑައިގެންނެވިއެވެ.
އެމްޑީޕީގެ ޓީމު، އިހަވަންދުއަށް ޒިޔާރަތް ކޮށްފައި ވަނީ މިއަދު ހަވީރު 5:00 ގައެވެ. އެމްޑީޕީގެ ޓީމަށް މަރުޚަބާ ދެންނެވުމަށްޓަކައި ގިނަ ޢަދަދެއްގެ ރައްޔިތުން ބަނދަރުމައްޗަށް ޖަމާވިކަން ފާހަގަ ކުރެވެއެވެ.
ޑރ. މުސްޠަފާގެ ޓީމު، އިހަވަންދުއަށް ކުރެއްވި ޒިޔާރާތުގައި އިހަވަންދޫގެ އެމްޑީޕީގެ ހަރުގޭގައި ބައްދަލުވުމެއް ބާއްވާފައި ވެއެވެ. އަދި “ނެތޭވެވޭކަށް ބާޣީއަކަށް” މިނަމުގައި ތައްޔާރުކޮށްފައިވާ ބިލްބޯޑެއް ހަރުކުރުން އޮތެވެ. މިބިލްބޯޑު ހަރުކޮށްފައިވަނީ އިހަވަންދޫ ކައުންސިލް އިދާރާގެ ކުރިމަތިން، ބަހާރުގޭގެ އިރުމަތީ މަގު ފާރުގައެވެ.
އެމްޑީޕީން ހާމަކޮށްފައިވާ ގޮތުގައި މުސްޠަފާގެ މިދަތުރު ފުޅަކީ “ނެތޭ ވެވޭކަށް ބާޣީއަކަށް” ނަމުގައި އެމްޑީޕީގެ އެއްބުރުން ކެމްޕެއިންގެ ދަތުރުފުޅުތަކެކެވެ. އަދި މި ދަތުރުފުޅުތައް ތާވަލު ކުރެވިފައިވާގޮތުން 7 އޯގަސްޓާ ހިސާބަށް މި ދަތުރުފުޅުތައް ކުރިޔަށް ދާނެ ކަމަށްވެސް އެޕާޓީން ހާމަކުރައްވައެވެ.
