ހއ އިހަވަންދޫ އާމިނާދިޔޯ ސިއްޙީމަރުކަޒުގައި ޑައިލިސިސް ސެންޓަރެއް ހެދުމަށް ނާޑު ޕްރައިވެޓް ލިމިޓަޑާއި ހަވާލުކޮށްފިއެވެ. ހެލްތް މިނިސްޓްރީގެ އޮފިޝަލަކު މައުލޫމާތު ދެއްވިގޮތުގައި އެމަސައްކަތް ނާޑާއި ހަވާލުކޮށްފައިވަނީ މިދިޔަ ޖޫން މަހުއެވެ. އަދި ޑައިލިސިސް ސެންޓަރުގެ މަސައްކަތް ނިންމައި މިއަހަރުގެ އޮކްޓޯބަރ މަހު ހިދުމަތް ފަށަންޖެހެއެވެ.
އާމިނާދިޔޯ ޞިއްޙީ މަރުކަޒު އަޕްގްރޭޑްކޮށް ޑަޔަލިސިސްގެ ޚިދުމަތް ފެށުމަށް މަސައްކަތް ކުރައްވާނެކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، މިއަހަރުގެ ފެބުރުއަރީ މަހުގެ 24 ވަނަ ދުވަހު ވިދާޅުވިއެވެ. ރައީސުލްޖުމްހޫރިއްޔާ އެހެން ވިދާޅުވީ އިހަވަންދޫގެ ރައްޔިތުންނާ ބައްދަލުކުރައްވައި، ވާހަކަފުޅު ދައްކަވަމުންނެވެ. “ދެން ހަމަ އެއާއެކީގައި، ޞިއްޙީ ދާއިރާގެ ވާހަކައިގައި އަޅުގަނޑަށް ހަމަ ނުދެންނެވި ދިޔަ ކަމެއް. ޑައިލިސިސް ޚިދުމަތް ޤާއިމުކޮށްދޭން. މި ރަށުގެ ރައްޔިތުން ހަމަ ވަރަށް ބޮޑަށް އެދިވަޑައިގަންނަވާ. ވަރަށް ކޭސަސް ގިނަ. އަޅުގަނޑު ދެން މިއަދު ސަލާންކުރުމުގައި ދިމާވި ބޭފުޅުންކޮޅެއްވެސް ހަމަ އެ ވާހަކަ ފާހަގަކުރެއްވި.” ރައީސް ވިދާޅުވިއެވެ.
ޖޫން މަހުގެ 29 ވަނަ ދުވަހު ނާޑު ޕްރައިވެޓް ލިމިޓެޑްގެ ބޭފުޅުން އާމިނާދިޔޯ ސިއްޙީމަރުކަޒަށް ވަޑައިގެން ތަނުގެ އިންސްޕެކްޝަނެއްވަނީ ހަދައިފައެވެ. ނާޑު ޕްރައިވެޓް ލިމިޓެޑަކީ ފުޅާ ދާއިރާގައި މެޑިކަލް އިކުއިޕްމަންޓާއި ފާމަސިއުޓިކަލް ވިޔަފާރިކުރާ ކުންފުންޏެކެވެ. ނާޑު އަކީ ރާއްޖެ އަށް ގިނަ މެޑިކަލް ބްރޭންޑުތަކެއް ތައާރަފު ކޮށްފައިވާ ކުންފުންޏެކެވެ. އެ ކުންފުނިން ތައާރަފު ކުރި ބްރޭންޑުތަކުގެ ތެރޭގައި ޖަރުމަނުގެ ސާސްޓަޑް އާއި ޖަޕާނުގެ ނިހޯން ކޯޑުން އަދި ކޮރެއާގެ ބޮޑިޓެކް އާއި އެމެރިކާގެ ޑެންޓަލް އިކުވިޕްމަންޓް ބްރޭންޑް ހެންރީ ޝައިން ހިމެނެއެވެ. އެކުންފުނިންދަނީ ބެކްސްޓާ ޑަޔަލެސިސް މެޝިންނާއި ރީއެޖެންޓްސް ބައެއް ހޮސްޕިޓަލްތަކަށް ފޯރުކޮށްދެމުންނެވެ.
