އިހަވަންދޫގައި ތެލުގެ ވިޔަފާރިކުރުމަށް ބިން ކުއްޔަށް ދޫކުރުމަށް، ތިލަދުންމަތީ އުތުރުބުރީ އިހަވަންދޫ ކައުންސިލްގެ އިދާރާ ހުޅުވައިލުމުން ޕްރޮޕޯސަލް ހުށަހެޅި ފަރާތްތަކުގެ ތެރެއިން އެންމެ ރަނަގަޅު ޕްރޮޕޯސަލެއް ހުށަހެޅި ޕަވަރ ޒޯނާއިއެކު، އެއްބަސްވުމުގައި ސޮއެކޮށްފިއެވެ. ތެލުގެ ވިޔަފާރިކުރުމަށް ބިން ކުއްޔަށް ދޫކުރުމަށް ވެވޭ އެއްބަސްވުމުގައި ޕަވަރ ޒޯންއާއި އެކު ސޮއެ ކޮށްފައިވަނީ އިއްޔަ އިހަވަންދޫ ކައުންސިކްގެ އިދާރާގައި ބޭއްވި ރަސްމިއްޔާތެއްގައެވެ.
އިހަވަންދޫ އައިސް ޕްލާންޓްގެ ދެކުނަށް އޮތް 5372 އަކަފޫޓް ގެ ބިން ތެލުގެ ވިޔަފާރި ކުރުމުގެ ޚިދުމަތްދިނުމަށް ކުއްޔަށް ދޫކޮށްފައިވަނީ 20 އަހަރު ދުވަހުގެ މުއްދަތަށެވެ. ބިމުގެ އަކަފޫޓަކަށް މަހަކު 2.05ރ ޕަވަރ ޒޯނުން ހުށަހަޅާފައިވާއިރު ބިމު ކުއްޔަށް މަހަކު 11,012.6ރ ދައްކަން ޖެހޭނެއެވެ.
ޕަވަރ ޒޯނުން މިހާރުވެސް އަންނަނީ އިހަވަންދޫގައި ތެލުގެ ވިޔަފާރި ކުރަމުންނެވެ. ތެލުގެ ވިޔަފާރިއަށް ބިން ކުއްޔަށް ދޫކުރުމަށް ކައުންސިލުން ކޮށްފައިވާ އިޢުލާނުގައި ވާގޮތުން، ކައުންސިލުން ބިން ހަވާލުކުރާތާ 3 މަސްތެރޭ ތަނުގައި މަސައްކަތް ކުރުމުގެ ޢަމަލީ މަސައްކަތް ފަށަންޖެހެއެވެ. އަދި ބިން ހަވާލުކުރާތާ މަދުވެގެން 10 މަސް ދުވަހުގެ ތެރޭގައ ތަނުގެ ޚިދުމަތް ދޭންޖެހެއެވެ. އެހެން ކަމުން އެ 10 މަހަށް ބިމު ކުއްޔެއް ނުނަގާނެއެވެ.
