ވެހިކަލްތައް އޮޕަރޭޓް ކުރުމަށް ބޭނުންވާ ތެޔޮ ހުސްވެ، އެމްޓީސީސީގެ އިހަވަންދޫ ސައިޓްގެ މަސައްކަތް އަނެއްކާވެސް ހުއްޓިއެއްޖެއެވެ. މިވަގުތު އެމްޓީސީސީއިން އިހަވަންދޫގައި ކުރިއަށް ގެންދަނީ ހިއްކި ބިމުގެ ވަށައިގެން ރިވެޓްމަންޓް ޖެހުމުގެ މަސައްކަތެވެ.
ތެޔޮ ލިބުންދަތިވެ އިހަވަންދޫ އެމްޓީސީސީ ސައިޓްގެ މަސައްކަތްތައް ހުއްޓުމަކީ ފަހަކައްއައިސް ވަރަށް އާންމުކަމެކެވެ. މައުލޫމާތު ލިބިފައިވާ ގޮތުގައި އެންމެ ފަހުން މިދިޔަ އޮކްޓޯބަރ މަހުގެ ފަހުކޮޅު، އެމްޓީސީސީ އިހަވަންދޫ ސައިޓަށް ލިބިފައިވަނީ 3000 ލީޓަރެއްހާ ތެލެވެ. އެއީ ހަފުތާއެއްހާ ދުވަހު މަސައްކަތްކުރާހާ ތެލެވެ.
އިހަވަންދޫ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫޢު އެމްޓީސީސީއާ ހަވާލުކޮށްފައިވަނީ 10 ނޮވެމްބަރު 2020 ގައެވެ. ނަމަވެސް 1409 ފާއިތުވިއިރުވެސް އެމަސައްކަތް ނިމިފައެއް ނުވެއެވެ. އިހަވަންދޫގައި ތަރައްޤީކުރުމަށް ނިންމާފައިވާ ފިޝް ކަލެކްޝަން ފެސިލިޓީއަށް ބޭނުންވާ ބަނދަރު ތަރައްޤީކުރުމުގެ މަޝްރޫޢުވެސް ހަވާލުކޮށްފައިވަނީ އެމްޓީސީސީއާއެވެ. އެމަސައްކަތް އެ ކުންފުންޏާ ހަވާލުކުރެވުނީ 17 އޯގަސްޓު 2023 ގައެވެ. އެހެންނަމަވެސް، 399 ދުވަސް ފާއިތުވެގެން ގޮސްފައިވީ ނަމަވެސް، އެ މަޝްރޫޢުގެ ޢަމަލީ މަސައްކަތް އަދިވެސް ފެށިފައެއް ނުވެއެވެ.
