ކީވޯލް އަޑިއަށްގޮސް ގަނބައިގަނެ އަރިވުމުގެ ސަބަބުން ބަންދުކޮށްފައިވާ ސިޑީގެ އިންވެގެން، ހުޅަނގަށް އޮތް ސަރަހައްދުގެ ޕޭވްމަންޓްގެ ދަށުން ވެލިގަނޑު ދަމައިގަނެ އެސަރަހައްދުގެ ހާލަތު ގޯސްވެއްޖެއެވެ.
އެ ސަރަހައްދުގެ ޕޭވްމަންޓްގެ ދަށުން ފަސްގަނޑު ދަމައިގަނެފައިވީ ނަމަވެސް، އަދިވެސް އެ ސަރަހައްދު ބަންދުކޮށްފައި ނުވާތީ، އާންމުން ދަނީ އެތަން ބޭނުންކުރަމުންނެވެ. އިއްޔެވެސް އެ ސަރަހައްދުން މުދާ ބާލާފައިވާކަން ފާހަގަކުރެވެއެވެ.
ފެރީ ޓާމިނަލް ކުރިމަތީގައިވާ، ފަސިންޖަރުންނަށް ޚާއްޞަކޮށްފައިވާ ސިޑީގެ ކީވޯލް އަޑިއަށް ދިއުމާ ގުޅިގެން، އިހަވަންދޫ ކައުންސިލުން އެ ސިޑި ބަންދުކޮށްފައިވަނީ 2023 ވަނަ އަހަރުގެ އޯގަސްޓް މަހުގެ 2 ވަނަ ދުވަހުއެވެ. އަދި އެ ސިޑީގެ ހާލަތު އިތުރަށް ގޯސްވުމާ ގުޅިގެން، މިއަހަރުގެ ޖޫން މަހުގެ 27 ވަނަ ދުވަހު ވަނީ ސިޑި ވަށައިގެން ދަގަނޑު ޖަހައި އެ ސަރަހައްދު ބަންދުކޮށްފައެވެ.
މިހާރު އަރާ ފޭބުމަށް ބޭނުންކުރަމުންދަނީ އިހަވަންދޫ ޕޮލިސް ސްޓޭޝަން ކުރިމަތީގައިވާ ސިޑިއެވެ. މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން އެމްޓީސީސީއާ ހަވާލުކޮށްގެން ކުރިއަށް ގެންދިޔަ އިހަވަންދޫ ބަނދަރު އަޕްގްރޭޑް ކުރުމުގެ މަޝްރޫޢުގައި މިހާރު ގަނބަމުންދާ ސިޑި ހިމެނޭ ސަރަހައްދު މަރާމާތުކޮށްފައެއް ނުވެއެވެ. ނަމަވެސް ބަނދަރުގެ މެއިންޓެނަންސް ޑްރެޖިންގގެ މަސައްކަތް ވަނީ ކޮށްފައެވެ.
އިހަވަންދޫ ކައުންސިލްގެ ސަމާލުކަމަށް މި މައްސަލަ އައިސްފައިވޭތޯ ބެލުމަށް މި ނޫހުން ކުރި މަސައްކަތުން ކައުންސިލްގެ ބަހެއް ލިބިފައެއް ނުވެއެވެ.
