އިހަވަންދޫ ހީނާމާގޭގައި ހުރި ތަކެއްޗަށް ގެއްލުންދިން މައްސަލާގައި ބަޔަކު ހައްޔަރުކުރިކަމަށް ފުލުހުން ބުނެފިއެވެ. މި މައްސަލައާ ގުޅޭގޮތުން މި ނޫހުން ކުރި ސުވާލަކަށް ޖަވާބުދެއްވަމުން، ފުލުހުންގެ މީޑިއާ އޮފިޝަލް ވިދާޅުވީ މި މައްސަލައާ ގުޅިގެން 3 ބަންގްލަދޭޝް ރައްޔިތުންނާއި 1 ދިވެހި ރައްޔިތަކު 24 ގަޑިއިރަށް ހައްޔަރުކުރި ކަމަށެވެ. އަދި މި މައްސަލައިގެ ތަޙުޤީޤު ފުލުހުން ކުރިއަށް ގެންދަމުންދާ ކަމަށްވެސް އެ ފަރާތުން މަޢުލޫމާތު ދެއްވިއެވެ. މައުލޫމާތު ލިބިފައިވާ ގޮތުގައި ފުލުން ހައްޔަރުކުރި އެންމެންވެސް މިހާރުވަނީ ދޫކޮށްލައިފައެވެ.
ހީނާމާގެ ހުންނަނީ އިހަވަންދޫ ސްކޫލުގެ ދެކުނުން، ދަނބުރުއްމަގާއި ގުލްފާމުގެ ހިނގުމާއި ފައްތަރުވާ ސަރަޙައްދުގެ ކަންމަތީގައެވެ. އެ ގެއަކީ މިހާރު އެއްވެސް ފަރާތެއް ދާއިމީކޮށް ދިރިއުޅޭ ތަނެއް ނޫނެވެ. ގޭގެ ވެރިފަރާތް ދިރިއުޅެމުންދަނީ މާލޭގައި ކަމަށާއި، ޗުއްޓީ ދުވަސްވަރު ރަށަށް ޒިޔާރަތްކުރާއިރު އެ ގޭގައި މަޑުކުރާ ކަމަށް މަޢުލޫމާތު ލިބިފައިވެއެވެ.
މަޢުލޫމާތު ލިބިފައިވާ ގޮތުގައި އެ ގެއަށް ގެއްލުން ދީފައިވާ ކަމަށް ލަފާކުރެވެނީ މިދިޔަ އަންގާރަ ވިލޭރެއެވެ. ގޭގައި ހުރި ފަރުނީޗަރާއި، އިލެކްޓްރޯނިކް ސާމާނު އަދި އެހެނިހެން ތަކެއްޗަށް ބޭނުން ނުކުރެވޭ ވަރަށް ގެއްލުން ދީފައިވާ ކަމަށް މައުލޫމާތުލިބެއެވެ.
