ހއ އަތޮޅުގެ ރަށްތަކަށް ހުޅުވާލައިގެން “ތިލައުތުރު ފުޓްސަލް މުބާރާތް – 2024” ގެ ނަމުގައި، ހއ އަތޮޅު ކައުންސިލާއި ހއ ކެލާ ކައުންސިލް ގުޅިގެން ބާއްވާ ފުޓްސަލް މުބާރާތުގެ ފުށުމުގެ ގޮތުންކުޅުނު، ޗެރިޓީ ސީލްޑް މެޗް ކެލާ ޓީމުން ކާމިޔާބު ކޮށްފިއެވެ.
ތިލައުތުރު ޝީލްޑް މެޗްގައި ވާދަކުރީ މިދިޔަ އަހަރުގެ މިމުބާރާތުގެ ޗެމްޕިއަން ޓީމް ކަމަށްވާ ވަށަފަރު، އަދި މިމުބާރާތް މިއަހަރު ހޯސްޓްކުރާ ކެލައެވެ. މިމެޗް 3-1 ގެ ނަތީޖާއަކުން ކާމިޔާބުކުރީ ކެލާ ޓީމެވެ.
މިމުބާރާތުގެ ގްރޫޕް ސްޓޭޖްގެ ކުޅުންފަށާނީ މިއަދުއެވެ. މިއަދު ހަވީރުގެ ފުރަތަމަ މެޗްގައި ވަށަފަރު ނުކުންނާނީ ބާރަށާ ދެކޮޅަށެވެ. ހަވީރުގެ ދެވަނަ މެޗްގައި ތުރާކުނާ، ކެލާ ބައްދަލުކުރާނެއެވެ. މިރޭ 20:00 ގައި މުރައިދޫ، ފިއްލަދޫއާ ދެކޮޅަށް ނުކުންނައިރު، މިރޭގެ ފަހު މެޗްގައި އިހަވަންދޫ ނުކުންނާނީ އުތީމާ ދެކޮޅަށެވެ.
ޖުމުލަ 10 ޓީމެއް ބައިވެރިވެފައިވާ މިމުބާރާތް ކުރިޔަށްދާނީ މިމަހުގެ 11 އާއި ހަމަޔަށެވެ. މިމުބާރާތް ކުރިޔަށްދަނީ ޓީމްތައް ދެ ގްރޫޕަކަށް ބަހާލައިގެން ކޮންމެ ގްރޫޕެއްގައި ހިމެނޭ ޓީމް ތަކުގެ މެދުގައި ޕޮއިންޓް އުސޫލުން މެޗްތައްކުޅެ ކޮންމެ ގްރޫޕަކުން އެއްވަނަ އަދި ދެވަނަ ޓީމް ސެމީ ފައިނަލަށް ދަތުރުކުރާ ގޮތަށެވެ.
މިމުބާރާތުގައި ގްރޫޕް 1 ގައި ހިމެނެނީ ވަށަފަރު، މުރައިދޫ، ދިއްދޫ، ބާރަށް އަދި ފިއްލަދޫއެވެ. ގްރޫޕް 2 ގައި ހިމެނެނީ ތުރާކުނު، އުތީމް، އުލިގަން، ކެލާ އަދި އިހަވަންދޫއެވެ.
މިމުބާރާތަކީ ތިލައުތުރު ފުޓްސަލް މުބާރާތުގެ 3 ވަނަ މުބާރާތެވެ. މިދިޔަ އަހަރު ކުޅުނު މިމުބާރާތުގެ ދެވަނަ މުބާރާތުގެ ޗެމްޕިއަންކަން ހޯދީ ވަށަފަރު ޓީމެވެ. މި މުބާރާތުގެ ޗެމްޕިއަން ޓީމަށް 30000 (ތިރީސްހާސް) ރުފިޔާ، ރަނަރަޕް ޓީމަށް 15000 (ފަނަރަހާސް) ރުފިޔާ އަދި ފެއާޕްލޭ ޓީމަށް 10000 (ދިހަހާސް) ރުފިޔާގެ ފައިސާގެ އިނާމުވަނީ ހުށަހަޅާފައެވެ.
