ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ) ގެ ޚިދުމަތް އިހަވަންދޫގައި ފެށުމާއި ގުޅޭގޮތުން އެކުންފުނިން މިނޫހާއި ހިއްސާކޮށްފައިވާ ބައެއް މައުލޫމާތު، އިހަވަންދޫ ކައުންސިލުން ދޮގޮކޮށްފިއެވެ.
އިހަވަންދޫ ކައުސިލްގެ ރައީސް، އަހްމަދު ސޮބާހް މިނޫހަށް މައުލޫމާތު ދެއްވަމުން ވިދާޅުވީ، ކައުންސިލުން ވެމްކޯއާ ކުނި މެނޭޖްކުރުން ހަވާލުކުރުމަށް ނިންމާފައިވާ ކަމަށާއި، އެކަމާ ގުޅޭ ގޮތުން މަޝްވަރާކުރެވި އެގްރީމެންޓް ޑްރާފްޓް ކުރެވިފައިވީ ނަމަވެސް، އަދި އެގްރީމެންޓްގައި ސޮއި ނުކުރާ ކަމަށެވެ. އަދި ކައުންސިލްގެ އިރުޝާދުގެ ދަށުން ވެމްކޯގެ އެއްވެސް މުވައްޒަފަކު މަސައްކަތް ނުކުރާ ކަމަށްވެސް ކައުންސިލްގެ ރައީސް ވިދާޅުވިއެވެ.
މިނޫހުންކުރި ސުވާލެއްގެ ޖަވާބުގައި، ވެމްކޯއިން ދީފައިވާ މަޢުލޫމާތުގައި އެ ކުންފުނީގެ ޚިދުމަތް އިހަވަންދޫގައި ފެށުމަށް ތާވަލްކޮށްފައިވަނީ 2025 ވަނަ އަހަރުގެ ފެބްރުއަރީ މަހުގެ ތެރޭގައި ކަމަށް ބުނެފައިވެއެވެ. އަދި މިހާރުވެސް އެ ކުންފުނީގެ 3 މުވައްޒަފުން (އެސިސްޓެންޓް މެނޭޖަރަކާއި، ދެ ސްޕަވައިޒަރުން) އިހަވަންދޫގައި ތިބިކަމަށާއި، އެ މުވައްޒަފުން މަސައްކަތް ކުރަމުންދަނީ އިހަވަންދޫ ކައުންސިލްގެ އިރުޝާދުގެ ދަށުން ރަށުގެ ކުނި މެނޭޖްކުރުމުގެ ޚިދުމަތް ފޯރުކޮށްދިނުމުގައި ކަމަށް ވެމްކޯއިން ބުނެފައިވެއެވެ.
އިހަވަންދޫގައި ވެމްކޯގެ އޮފީސް ގާއިމްކޮށް، އިހަވަންދޫ ރަށްވެހިގޭގައި އެކުންފުނީގެ ނަންބޯޑު މިއަހަރުގެ އޭޕްރިލް 13 ވަނަ ދުވަހު ހަރުކުރިއެވެ. ނަމަވެސް އެތަނުގައި ވެމްކޯގެ އެވެސް މަސައްކަތެއް ހިންގާފައެއްނުވެއެވެ. އަދި ފަހުން އެބޯޑްވެސް އެތަނުންވަނީ ނަގައިފައެވެ. އިހަވަންދޫ ކުނިގޮނޑު ހުސްކުރުމުގެ މަސައްކަތްވެސް މިއަހަރުގެ އޭޕްރިލް މަހު، ވެމްކޯއިން ފެށިއެވެ. ނަމަވެސް އެމަސައްކަތް އެއްކޮށް ނިންމައިނުލެވި ވަކިހިސާބަކުންވަނީ ހުއްޓިފައެވެ.
