ހއ އަތޮޅުގެ ރަށްތަކަށް ހުޅުވާލައިގެން، ހއ އަތޮޅު ކައުންސިލާއި ހއ މުރައިދޫ ކައުންސިލް ގުޅިގެން، ހއ. މުރައިދޫގައި ކުރިޔަށްގެންދާ “ތިލައުތުރު ވޮލީ މުބާރާތް 2024” ގެ ފައިނަލް މެޗް މިރޭ ކުޅޭނެއެވެ. މިމެޗްގައި ބައްދަލުކުރާނީ މުރައިދޫ އަދި އިހަވަންދޫއެވެ.
މުރައިދޫ ވޮލީ ކޯޓްގައި ކުޅޭ މިމެޗްގެ ކުޅުން ފަށާނީ މިރޭ 20:00 ގައެވެ. މިމުބާރާތުގެ ފައިނަލަށް އިހަވަންދޫ ދަތުރު ކުރީ ގްރޫޕް 2 ގެ އެއްވަނަ ޓީމްގެ ގޮތުގައި ސެމީފައިނަލަށް ދަތުރުކޮށް، ސެމީފައިނަލް ފުރަތަމަ މެޗުގައި މުރައިދޫ ބަލިކޮށްގެންނެވެ. މިމުބާރާތުގެ ފައިނަލަށް މުރައިދޫ ދަތުރުކުރީ ގްރޫޕް 1 ގެ އެއްވަނަ ޓީމްގެ ގޮތުގައި ސެމީ ފައިނަލަށް ދަތުރުކޮށް، ސެމީފައިނަލް ފުރަތަމަ މެޗްގައި އިހަވަންދޫ އަތުން ބަލިވުމުން، ސެމީފައިނަލް ތިންވަނަ މެޗްގައި ބާރަށް ބަލިކޮށްގެންނެވެ.
މި މުބާރާތުގައި ބައިވެރިވެފައިވަނީ 7 ޓީމެވެ. އެއީ މުރައިދޫ، އުތީމް، ކެލާ، ވަށަފަރު، އިހަވަންދޫ، ބާރަށް އަދި ދިއްދޫއެވެ. މުބާރާތް ކުރިއަށްދަނީ ދެ ގްރޫޕަކަށް ބަހާލައިގެންނެވެ. މި މުބާރާތުގެ ޗެމްޕިއަން ޓީމަށް 20،000 ރުފިޔާ، ރަނަރަޕް ޓީމަށް 10،000 ރުފިޔާ އަދި ފެއަރ ޕްލޭ ޓީމަށް 5،000 ރުފިޔާގެ ފައިސާގެ އިނާމު ދިނުމަށް ވަނީ ހަމަޖެހިފައެވެ.
