މައިކަޕް މުބާރާތުގެ އެންމެ ކާމިޔާބު ކޯޗް، ހަމްޒާ އިބްރާހީމް މިފަހަރު ފެންނާނީ އެންވީކޭ ޓީމުންކަން ކަށަވަރު ވެއްޖެއެވެ. އެންވީކޭގެ މެނޭޖަރު އަލީ ރަޝީދުވަނީ މިނޫހަށް އެކަން ކަށަވަރު ކޮށްދީފައެވެ.
ހަމްޒާވަނީ އެކި ޓީމް ތަކާއި އެކު ޖުމްލަ 4 ފަހަރު މައިކަޕް ކާމިޔާބު ކޮށްފައެވެ. އެއީ 2011 ވަނަ އަހަރު ދަނބުކުރި، 2012 ވަނަ އަހަރު އެންވީކޭ، 2015 ވަނަ އަހަރު ޔުނައިޓެޑް ޔޫތު އަދި 2016 ވަނަ އަހަރު ނިކަ ޓީމާއި އެކުއެވެ.
މައިކަޕްގެ އެންމެ ކާމިޔާބު ކޯޗް ހަމްޒާ، މިފަހަރުގެ މައިކަޕްގައި ކޯޗް ކޮށްދޭ އެންވީކޭ ޓީމަކީ މައިކަޕްގެ ތާރީޙްގައި އެންމެގިނައިން ފައިނަލްގައި ކުޅެފައިވާ ޓީމްކަންވެސް ފާހަގަކުރެވެއެވެ. އެޓީމްވަނީ 4 ފައިނަލެއްގައި ކުޅެފައެވެ. އޭގެ ތެރެއިން އެޓީމަށް ތަށި ކާމިޔާބުކުރެވުނީ އެންމެ ފަހަރަކުއެވެ. ފާގަކުރެވޭކަމަކީ އޭޓީމަށް މައިކަޕްގެ ތަށި އުފުލާލެވުނު 2012 ވަނަ އަހަރު އެޓީމްގެ ކޯޗަކީ ހަމްޒާކަމެވެ.
ހަމްޒާއާ އެންމެ ގާތުން ވާދަކުރާ ކޯޗުންނަށް މުބާރާތް ކާމިޔާބުކުރެވިފައިވަނީ 2 ފަހަރު އެވެ. އެއީ 2007 އަދި 2008 ވަނަ އަހަރު އެމްޕީ3 އަދި ޕީއެސް3 އާއެކު މުބާރާތުގެ ތަށި އުފުލައިލި ޢަބްދުއްރަޝީދު ޙުސައިން، 2010 އަދި 2014 ވަނަ އަހަރު މާރަންދޫ ޔޫތު ސޮސައިޓީއާއި މާރަންދޫ ޔޫތު ކޯޕަރޭޝަނަށް ތަށި ހޯދައިދިން ޙުސައިން ނާސިރު އަދި 2017 ވަނަ އަހަރު ޖަންގަލްއަށް އަދި 2019 ވަނަ އަހަރު ޔުންއިޓެޑް ޔޫތަށް ތަށި ހޯދައިދިން ހުސައިން ފަޔާޒްއެވެ.
އެންވީކޭގެ މެނޭޖަރު އަލީ ރަޝީދު ފާހަގަކުރި ގޮތުގައި، އެޓީމްގެ މެނޭޖްމަންޓަށް ލިބޭ އެންމެ ބޮޑު ހިންހަމަ ޖެހުމަކީ ކޯޗް ހަމްޒާގެ މަލިމީ ކަމުގެ ދަށުން، މީގެ ކުރިންވެސް އަދި މިއަހަރުވެސް ގިނަ ކާމިޔާބީތަކެއް ހޯދައިފަވާ ގިނަ ކުޅުންތެރިންތަކެއް އެޓީމްގައި ހިމެނުމެވެ. “ކޯޗް ހަމްޒާ އެންވީކޭ ޓީމަށް އިރުޝާދު ދޭން ހުރުމަކީ އިދިކޮޅު ޓީމްތަކަށް އޮންނާނެ ޕްރެޝަރެއް ކަމަށް ދެކެން” އަލީގެ ވާހަކަ ކުރިޔަށް ގެންދިޔައެވެ.
އިހަވަންދޫގައި މިއަހަރު ކުޅުނު އިލަވަން އަ ސައިޑް ދެ މުބާރާތް ކަމަށްވާ، އިމަގު ޢާޒީ ކަޕާއި ކައުންސިލް ކަޕްގެ ޗެމްޕިއަން ޓީމަކީ އެންވީކޭއެވެ. އެ ދެ މުބާރާތްވެސް އެންވީކޭއިން ކާމިޔާބުކުރީ ކޯޗް ހަމްޒާގެ އިރުޝާދުގެ ދަށުންނެވެ.
ކޯޗް ހަމްޒާގެ ބެލުމުގެ ދަށުން ރެއިން ފެށިގެން އެންވީކޭ އިންވަނީ މައިކަޕަށް ޕްރެކްޓިސް ފަށައިފައެވެ. މެނޭޖަރު އަލީ ހުރީ އުފަލުންނެވެ. ޓީމްގެ ގިނަ ކުޅުންތެރިން ރަށުގައި ތިބެ ޕްރެކްޓިސްގައި ބައިވެރިވަމުން ދާދިއުމަކީ މުބާރާތާއި މެދު ޓީމުން ކުރަމުންދާ އުއްމީދު ހާސިލްކުރުމަށް، ޓީމްގެ ކޮންމެ ކުޅުންތެރިއެއްވެސް ބޭނުންވެފައިވާ މިންވަރު ހާމަވާކަމެއްކަމަށް އަލީ ދެކެއެވެ.
މިއަހަރުގެ މައިކަޕް މުބާރާތުގައި ބައިވެރިވި 9 ޓީމްގެ ތެރެއިން މައިކަޕްގެ އެންމެ ދިގު ތާރީހެއް އޮތް ޓީމަކީ އެންވީކޭއެވެ. ކޯޗް ހަމްޒާއަކީވެސް މައިކަޕްގެ ވަރުގަދަ ބްރޭންޑެކެވެ. 2008 ވަނަ އަހަރު ނިކަ ބިއްސާވެލި ޓީމުގެ ކޯޗެއްގެ ގޮތުގައި މައިކަޕަށް ނުކުތް ގޮތަށް އަދިވެސް ހަމްޒާ އެހުރީ ދަނޑު މަތީއެވެ. 5 ވަނަ ތަށީގެ އިންތިޒާރުގައެވެ.
