އިހަވަންދޫގައި، ޑީޕް ސީ މެއިންޓަންސް ޓާމިނަލަކާއި ޑޮކްޔާޑެއް ހަދަނީ

ރާއްޖޭގެ އުތުރުގައި ފެށުމަށް ހަމަޖެހިފައިވާ ބަންކަރިން ޚިދުމަތުގެ ދެވަނަ ފިޔަވަހީގެ ދަށުން، ޑީޕް ސީ މެއިންޓަނެންސަށް ހާއްސަ ޓަރމިނަލަކާއި ޑޮކްޔާޑެއް، އިހަވަންދޫގައި ތަރައްޤީ ކުރާނެކަމަށް އެމްޕީއެލްގެ ސީއީއޯ މުޙައްމަދު ވަޖީހު އިބްރާހިމް ވިދާޅުވެއްޖެއެވެ. ވަޖީހު މިހެން ވިދާޅުވީ ރޭ ޕީއެސްއެމް ނިއުސްގެ "ރާއްޖެ މިއަދު" ޕްރޮގްރާމުގައި ވާހަކަދައްކަވަމުންނެވެ. ވަޖީހު ވިދާޅުވީ  އުތުރަށް ދަތުރުކުރާ ބޯޓުފަހަރަށް ބޭނުންވާ ޑީޕް ސީ މެއިންޓަނެންސަށް ހާއްސަ ޓަރމިނަލެއް ހއ. އިހަވަންދޫގައި ގާއިމުކުރުމަށް ނިންމާފައިވާއިރު، ވަރަށް އަވަހަށް  ބޯޓުތަކަށް ޚިދުމަތް ދިނުމަށް ޑޮކްޔާޑެއްވެސް ގާއިމުކުރުމަށް ނިންމާފައިވާކަމަށެވެ. މައުލޫމާތު ލިބިފައިވާ ގޮތުގައި އެމްޕީއެލްއިން މިތަން ތަރައްޤީކުރަނީ އިހަވަންދޫގެ އިރުއުތުރު ކޮޅުގައެވެ. ބަންކަރިން ޚިދުމަތުގެ ދެވަނަ ފިޔަވަހީގެ ދަށުން އިހަވަންދިއްޕޮޅުގައި ގިނަ މަޝްރޫއުތަކެއް ފެށުމަށް ހަމަޖެހިފައިވާކަމަށް ވަޖީހު ވިދާޅުވިއެވެ. އެގޮތުން ހޯރަފުށި ފަޅު ހިއްކައިގެން، އެތަނުގައި ތެޔޮ ޓާމިނަލަކާއި ބައިނަލްއަގުވާމީ ފެންވަރުގެ ކޮންޓެއިނާ ޓާމިނަލެއް ތަރައްގީކުރުމަށް ނިންމާފައިވާއިރު އެރަށުގައި ބިޒްނަސް ސެންޓަރެއް ތަރައްޤީ ކުރާނެއެވެ. މީގެއިތުރުން އުލިގަމުގައި ޔޮޓު މެރީނާއެއް ޤާއިމުކުރުމަށް ތައްޔާރުވަމުންދާކަމަށްވެސް ވަޖީހު ވިދާޅުވިއެވެ. ރާއްޖޭގެ އުތުރުގައި ފެށުމަށް ހަމަޖެހިފައިވާ ބަންކަރިން ޚިދުމަތް މަހުގެ 19ވަނަ ދުވަހު ފެށުމަށް އެންމެ ފަހުގެ ތައްޔާރީތައް ވަމުންދާއިރު، އެޙިދުމަތް ދިނުމަށް ނިންމާފައިވަނީ  އޮފް-ޝޯ ކޮށެވެ. އެގޮތުން ޙިދުމަތް ފަށައިގަންނައިރު މެރިޓައިމްގެ 14 ޚިދުމަތެއް ބޯޓުތަކަށް ފޯރުކޮށްދޭނެއެވެ.