"ރަންތާޖު" ޤުރްއާން މުބާރާތުން އިހަވަންދޫ ޓީމަށް ލިބުނު ފައިސާ ފަލަސްތީނުގެ ރައްޔިތުންނަށް ހަދިޔާކުރަން ނިންމައިފި

ތިލަދުންމަތީ އުތުރުބުރީ އަތޮޅު ކައުންސިލުން އިންތިޒާމް ކޮށްގެން ކުރިއަށް ގެންދިޔަ “ތިލައުތުރު ރަންތާޖު ޤުރުއާން މުބާރާތް 2024” ޤުރްއާން މުބާރާތުން އިހަވަންދޫ ޓީމަށް ލިބުނު ފައިސާގެ އިނާމު ފަލަސްތީނުގެ ރައްޔިތުންނަށް ހަދިޔާ ކުރުމަށް ނިންމައިފިއެވެ. އެގޮތަށް ނިންމާފައިވަނީ އިއްޔަ ބޭއްވި  އިހަވަންދޫ ކައުންސިލްގެ 4 ވަނަ ދައުރުގެ 170 ވަނަ އާއްމު ޖަލްސާގައެވެ. އިހަވަންދޫ ޓީމުގެ ކަންކަމުގައި އިސްކޮށް އުޅުއްވި، ކައުންސިލް މެމްބަރު މުހައްމަދު ޒާހިރު ހަސަން ވިދާޅުވީ، ޓީމަށް ލިބުނު ފައިސާގެ އިނާމު ފަލަސްތީނުގެ ހާލުގައި ޖެހިފައިވާ ރައްޔިތުންނަށް ހަދިޔާކުރަން ނިންމީ، ޓީމްގެ ގިނަ މެމްބަރުންގެ އެދުމުގެ މަތިން ކަމުގައެވެ. މިދިޔަ އަހަރުގެ މުބާރާތުން އިހަވަންދޫ ޓީމަށް ލިބުނު ފައިސާގެ އިނާމުވެސް ފަލަސްތީނުގެ ރައްޔިތުންނަށް ހަދިޔާކުރިކަން ޒާހިރު ފާހަގަކުރެއްވިއެވެ. ހއ.އަތޮޅު “ރަންތާޖު” ޤުރްއާން މުބާރާތުގައި ބައިވެރިވި އިހަވަންދޫގެ ޓީމްވަނީ މުޅި މުބާރާތުން 2 ވަނަ ހޯދާފައެވެ. މުޅިމުބާރާތުން ދެވަނައަށް ދިއުމުން އެޓީމަށްވަނީ 7000ރ ގެ ފައިސާގެ އިނާމެއް ދީފައެވެ. ހއ.އަތޮޅު “ރަންތާޖު” ޤުރުއާން މުބާރާތުން މުޅިމުބާރާތުން އެއްވަނަ ހޯދީ އިހަވަންދޫ ޓީމްގައި ހިމެނޭ، އާމިނަތު ނަސްރަތު އެވެ. މިދިޔަ އަހަރުއޮތް ތިލައުތުރު ރަންތާޖު ޤުރުއާން މުބާރާތުން ދެވަނަ ހޯދީވެސް އިހަވަންދޫއެވެ. އެމުބާރާތުން ލިބުނު ފައިސާގެ އިނާމުވެސްވަނީ ފަލަސްތީނުގެ ރައްޔިތުންނަށް ހަދިޔާކޮށްފައެވެ.