ހއ. އިހަވަންދޫ (ޖުލައި 2، 2025): ހއ. އިހަވަންދޫގައި ކަރަންޓުގެ ޚިދުމަތް ފޯރުކޮށްދޭ ފެނަކަ ކޯޕަރޭޝަން ލިމިޓެޑްގެ އިހަވަންދޫ ބްރާންޗްގެ މައި ޖަނަރޭޓަރުތަކުގެ ތެރެއިން 1000 ކިލޯ ވޯޓްގެ ޖަނަރޭޓަރު ނަންބަރު 02 އަށް ޓެކްނިކަލް މައްސަލައެއް ދިމާވެ، ރަށުގެ ގިނަ ސަރަހައްދުތަކުން ކަރަންޓް ކެނޑިދާނެކަމުގެ ބިރު ހީވެއްޖެއެވެ.
ފެނަކަ އިހަވަންދޫ ބްރާންޗުން ނެރުނު އިޢުލާނެއްގައިވާ ގޮތުން، މިއަދުގެ ހެނދުނު 9:00 އިން ފެށިގެން، ޖަނަރޭޓަރު ނަންބަރު 02 އަށް ދިމާވެފައިވާ ޓެކްނިކަލް މައްސަލައާ ގުޅިގެން މެއިންޓެނަންސް މަސައްކަތެއް ކުރަމުންދާތީ، ރަށުގެ އެކި ސަރަޙައްދުތަކުން އެކި ގަޑިތަކުގައި ކަރަންޓުގެ ޚިދުމަތް މެދުކެނޑޭނެއެވެ.
މުއައްތަބަރު މަސްދަރަކުން ލިބިފައިވާ މަޢުލޫމާތުތަކަށް ބަލާއިރު، އެ ޖަނަރޭޓަރުގެ ހެޑް ގާސްކެޓްވަނީ ފަޅައިގެން ގޮސްފައެވެ. އަދި މިހާރު ދަނީ އެ ޖަނަރޭޓަރު މަރާމާތު ކުރުމުގެ މަސައްކަތް ކުރަމުންނެވެ. އަދި އެ ޖަނަރޭޓަރު ނުހެދިއްޖެނަމަ، އިހަވަންދޫގެ 60% އަށް ވުރެ ބޮޑު ސަރަހައްދަކުން ކަރަންޓުގެ ޚިދުމަތް މެދުކެނޑޭނެކަމުގެ ނުރައްކާ އެބައޮތެވެ.
ފެނަކަ އިހަވަންދޫ ބްރާންޗުން ވަނީ މި ދަނޑިވަޅުގައި ކަރަންޓް ބޭނުންކުރާ މިންވަރު ވީހާވެސް މަދުކުރުމަށް ކަސްޓަމަރުންނަށް އިލްތިމާސްކޮށްފައެވެ. އަދި ޖަނަރޭޓަރު ސެޓަށް ދިމާވި މައްސަލަ ހައްލުކުރުމަށްޓަކައި ކުރަންޖެހޭ މަސައްކަތްތައް ހުއްޓުމެއް ނެތި ބްރާންޗްގެ ފަންނީ މުވައްޒަފުން މިހާރުވެސް ދަނީ ކުރަމުންނެވެ. ކަރަންޓުގެ ޚިދުމަތް މެދުކެނޑުމުގެ ސަބަބުން ކަސްޓަމަރުންނަށް ކުރިމަތިވެދާނެ ދަތިތަކަށް ފެނަކަ އިހަވަންދޫ ބްރާންޗުން ނިހާޔަތަށް މާފަށް އެދިފައިވެއެވެ.
