މަދީހްއަށް މިރޭ ކުޅެވޭނެ – އެސިސްޓެންޓް ކޯޗް ހަމްމާޒް

މިރޭގެ ސެމީފައިނަލް މެޗުގައި  ކެޕްޓަން މަދީހް ފެންނާނެކަމަށް، އިހަވަންދޫ ޓީމްގެ އެސިސްޓެންޓް ކޯޗް އިސްމާއިލް ހަމްމާޒް ބުނެފިއެވެ. މިނޫހުންކުރި ސުވާލެއްގެ ޖަވާބުގައި ހަމްމާޒުބުނީ، މަދީހްއަށް ކުޅެވޭގޮތްވީ ވަރަށްގިނަ ބައެއްގެ މަސައްކަތުން ކަމުގައެވެ. އެހެންކަމުން އެފަރާތްތަކަށް އޭނާ ޝުކުރި އަދާކުދިއެވެ. މިމުބާރާތުގައި މަދީހް 3 މެޗް ކުޅެފައިވާއިރު، އިހަވަންދޫ ޓީމަށް އޭނާވަނީ 3 ގޯލް ޖަހައިދީ އެއް މެޗްގެ މޮޅު ކުޅުންތެރިޔާގެ މަޤާމް ހޯދައިފައެވެ. ނަމަވެސް ދިމާވި ކަންތައްތަކެއްގެ ސަބަބުން، އިހަވަންދޫ ޓީމް ގްރޫޕް ސްޓޭޖްގައި ކުޅުނު ފަހު މެޗްގައި މަދީހްއަށް ނުކުޅެވެއެވެ. އެމެޗްގައި މުބާރާތް ހޯސްޓްކުރާ ކެލާ އަތްދަށުވެ އިހަވަންދޫވަނީ 1-0 އިން ބަލިވެފައެވެ. ތިލައުތުރު ފުޓްސަލް މުބާރާތް 2024 ގެ ސެމީ ފައިނަލްގެ ދެވަނަ މެޗްގައި މިރޭ 20:00 ގައި އިހަވަންދޫ ނުކުންނާނީ، ދިއްދޫއާ ދެކޮޅަށެވެ. އިހަވަންދޫ ސެމީފައިނަލަށް ދަތުރުކުރީ 9 ޕޮއިންޓާއިއެކު ގްރޫޕް ބީ ގެ އެއްވަނަ ޓީމްގެ ގޮތުގައެވެ. ދިއްދޫ ސެމީފައިނަލުން ޖާގައެއް ކަށަވަރުކުރީ 6 ޕޮއިންޓާއި އެކު ގްރޫޕް އޭ ގެ ދެވަނަ ޓީމްގެ ގޮތުގައެވެ. މިމުބާރާތުގެ ސެމީ ފައިނަލްގެ ފުރަތަމަ މެޗްގައި ބައްދަލުކުރާނީ ބާރަށް އަދި އުތީމެވެ. އެމެޗް ފަށާނީ މިއަދު ހަވީރު 16:00 ގައެވެ.