ކަނޑާލިފިނޮޅު، ވަށަފަރަށް ދީފި!

ހއ. "ކަނޑާލިފިނޮޅު" އަކީ އެ އަތޮޅު "ވަށަފަރު" ގެ ބައެއް ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު ކަނޑައަޅުއްވައިފިއެވެ. ރައީސުލްޖުމްހޫރިއްޔާ މިގޮތަށް ކަނޑައެޅުއްވީ ޤާނޫނު ނަންބަރު 2010/7 (ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު) ގެ 134 ވަނަ މާއްދާގެ (ހ) އިން ރައީސުލްޖުމްހޫރިއްޔާއަށް ލިބިދޭ ބާރުގެ ދަށުންނެވެ. ރައީސުލްޖުމްހޫރިއްޔާގެ އޮފީހުން މަޢުލޫމާތު ދެއްވި ގޮތުގައި، ކަނޑާލިފިނޮޅަކީ ވަށަފަރުގެ އިޚްތިޞާޞްގެ ތެރޭގައި ހިމެނޭ ރަށެއްގެ ގޮތުގައި ހަމަޖެއްސެވީ  އެ ރަށުގެ ރައްޔިތުން އެކަމަށް އެދިފައިވާތީއެވެ. މި ނިންމެވުމާއެކު، ވަށަފަރުގެ އިދާރީ ދާއިރާގެ ބައެއްގެ ގޮތުގައި ކަނޑާލިފިނޮޅު ބެލެވިގެންދާނެއެވެ. ހއ. ކަނޑާލިފިނޮޅަކީ ވަށަފަރު ފަޅުތެރޭގައި އޮންނަ ރަށެކެވެ. ކަނޑާލިފިނޮޅުގެ އިތުރުން "ބީނާފުށި" ކިޔާ ފަޅުރަށެއްވެސް ވަށަފަރުގެ ފަޅުތެރޭގައި އޮވެއެވެ. ފާހަގަކޮށްލެވޭ ގޮތުގައި މި ދެ ރަށަކީ ހަލާލު ޓޫރިޒަމަށް ޚާއްޞަކޮށްގެން ތަރައްޤީކުރުމަށްޓަކައި މިދިޔަ އަހަރު ބީލަމަށްވެސް ހުޅުވާލާފައިވާ ދެ ރަށެވެ. ކަނޑާލިފިނޮޅުގެ އިތުރުން، ރައީސުލްޖުމްހޫރިއްޔާ މިއަދު ވަނީ މާޅޮސްމަޑުލު އުތުރުބުރީ "އުނގުލު" އަކީ އެ އަތޮޅު "އުނގޫފާރު" ގެ ބައެއްގެ ގޮތުގައިވެސް ކަނޑައަޅުއްވާފައެވެ.