ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން މުޅިން އަލަށް ތައާރަފްކޮށްގެން ބާއްވާ "އެފްއޭއެމް ފުޓްސަލް ޗެމްޕިއަންޝިޕް" ގެ ޒޯން ބުރުގައި އިހަވަންދޫ، ޖޭ ސްޕޯރޓްސް އެކަޑަމީއިން ކުޅުނު ފުރަތަމަ މެޗުން މޮޅުވެއްޖެއެވެ.
މިއަދު ހަވީރު ނައިވާދޫ ފުޓްސަލް ދަނޑުގައި ކުޅުނު މިމެޗުން ހަނިމާދޫއާ ވާދަކޮށް އިހަވަންދޫ މޮޅުވީ 2-1 އިންނެވެ. މިމެޗުގެ ފުރަތަމަ ގޯލް އިހަވަންދޫ ޓީމްގެ ހާމިދު ޖެހިއިރު، ހާމިދުގެ ގޯލަށް މިނެޓެއް ނުވަނީސް ހަނިމާދޫ ޓީމްގެ ތިލްހާމް ވަނީ ގޯލް ޖަހައި ނަތީޖާ ހަމަހަމަކޮށްފައެވެ. މިމެޗުން އިހަވަންދޫ މޮޅުކޮށްދިން ގޯލް މެޗްގެ ނިމެން ދަނިކޮށް ޖަހައިދިނީ އިހަވަންދޫ ޓީމްގެ ޒައިންއެވެ. މެޗްގެ މޮޅު ކުޅުންތެރިޔާއަށް ހޮވުނީ އިހަވަންދޫ ޓީމްގެ ހާމިދުއެވެ.
ޒޯން ބުރުގައި، އަންނަ ބުރާސްފަތު ދުވަހުގެ ހަވީރު އިހަވަންދޫ ޓީމް ނުކުންނާނީ ނައިވާދޫއާ ދެކޮޅަށެވެ. ނޯތް ޒޯން 1 ގައި 5 ޓީމެއް ވާދަކުރެއެވެ. އެއީ ހއ އަތޮޅުން، އިހަވަންދޫ އަދި ފިއްލަދޫ، ހދ އަތޮޅުން ނައިވާދޫ އަދި ހަނިމާދޫގެ އިތުރުން ށ އަތޮޅުން ކަނޑިތީމެވެ. ޒޯން ބުރުގެ ފައިނަލަށް ދަތުރުކުރާނީ މި 5 ޓީމްގެ މެދުގައި ކުޅޭ ލީގުބުރުން އެންމެ ގިނަ ޕޮއިންޓް ހޯދާ ދެ ޓީމެވެ.
ކޮމެންޓް
އަދި ކޮމެންޓެއް ނެތް