އިހަވަންދޫގެ ސަރުކާރު މުއައްސަސާތަކާއި ކްލަބް ޖަމިއްޔާތައް ގުޅިގެން މިއަހަރަގެ ފިތުރު އީދު ކުލަގަދަކޮށް ފާހަގަކުރުމަށް ހަރަކާތްތަކެއް ހިންގަން ނިންމައިފިއެވެ.
އީދުގެ ހަރަކާތްތައް ފެށުމަށް ހަމަޖެހިފައިވަނީ މިރެއެވެ. އެގޮތުން ފުރަތަމަ ހަރަކާތަކަށް އޮންނާނީ މިރޭ 20:30 ގައި އީދު ހުޅު ރޯކުރުމެވެ. އީރު ހުޅު ރޯކުރާނީ ހިއްކި ބިމުގައެވެ. މާދަމާގެ ހަރަކާތްތައް ފެށޭނީ އީދު ނަމާދުންނެވެ. މާދަމާ ހެނދެނު 7:00 ގައި ބޮޑު ޖަމާއަތުގައި އީދު ނަމާދުކުރުން ކުރިޔަށްދާނީ ޣާޒީ ފުޓްބޯޅަ ދަނޑުގައެވެ. އީދު ނަމާދަށްފަހު ޣާޒީ ދަނޑުގައި އީދު ސައި ކުރިޔަށް ދާނެއެވެ.
އީދު ދުވަހުގެ ހަވީރު ކުޑަކުދިންގެ ހަވީރު 16:30 ގައި އިހަވަންދޫ ދެކުނު ފަރާތު ބަނދަރު ސަރަހައްދުގައި ކުރިޔަށްދާނެއެވެ. ކުޑަކުދިންގެ ހަވީރުގައި އެކި ސްޓޯލްތައް ބައިވެރިކުރާއިރު ގިނަ ހަދިޔާތަކެއް ހޯދުމުގެ ފުރުސަތު ލިބިގެންދާނެއެވެ.
