ފަތުރުވެރިކަމާއި ގުޅުންހުރި ވިޔަފާރި ހިންގުމަށް، އިހަވަންދޫ ކައުންސިލުން ހުޅުވާލި ބިންތައް މިމަސްތެރޭ ބަޔަކާ ހަވާލުކުރެވޭނެކަމަށް އިހަވަންދޫ ކައުންސިލްގެ ރައީސް އަހްމަދު ސޮބާހް ވިދާޅުވެއްޖެއެވެ.
ފަތުރުވެރިކަމާއި ގުޅުންހުރި ވިޔަފާރި ހިންގުމަށް ހުޅުވާލި ބިންތަކާއި ގުޅޭގޮތުން ސުވާލުކުރުމުން ސޮބާހް ވިދާޅުވީ، ކައުންސިލުން ހުޅުވައިލި 3 ބިމަށްވެސް ރަނގަޅު ޕްރޮޕޯސަލްތަކެއް 3 ފަރާތަކުން ހުށަހަޅާފައި ވާކަމުގައެވެ. ސޮބާހް ވިދާޅުވީ މިހާރު ކުރިޔަށްދަނީ އެޕްރޮޕޯސަލްތައް އެވަލުއޫޓްކުރުމުގެ މަރުހަލާކަމަށާއ، މިމަސްތެރޭ އެބިންތައް ހަވާލުކުރެވޭނެ ކަމުގައެވެ.
ފަތުރުވެރިކަމާއި ގުޅުންހުރި ވިޔަފާރި ހިންގުމަށް އިހަވަންދޫއިން 3 ބިމެއް 25 އަހަރަށް ކުއްޔަށްދިނުމަށް އިހަވަންދޫ ކައުންސިލުން ހުޅުވައިލީ މިދިޔަ މޭ މަހުގެ 23 ވަނަ ދުވަހުއެވެ. އިހަވަންދޫ ކައުންސިލުން ކުއްޔަށް ދޫކުރުމަށް ހަމަޖެހިފައިވަނީ 3500 އަކަފޫޓްގެ 3 ބިމެކެވެ. ކުއްޔަށް ދޫކުރާ 3 ބިން އޮންނަނީ ދިލްޝާދު ހިނގުމުގެ ދެކުނުން ތިލޭރު ހިނގުމުގެ އިރަށެވެ.
