ދީނީ ދަރުސްތަކާއި ނަޞޭހަތްތައް އަޑުއެހުމަށް އައުމަށް ގޮވާލެވޭ ހިނދު އެދަރުސްތަކަށް އަންނަ މީހުން މަދުވުމަކީ ނުބައި ކަންތައްތަކެއް ފެށިއްޖެކަމަށް ދެވޭ އިންޒާރެއްކަމަށް އައްޝައިޚް ނަޞްރުﷲ މުސްޠަފާ ވިދާޅުވެއްޖެ އެވެ.
ޝައިޚް ނަޞްރުﷲ މިހެން ވިދާޅުވީ އިހަވަންދޫ ޔޫތު އެސޯސިއޭޝަން ފޯރ ރެކްރިއޭޝަން އެންޑް އާރބަނައިޒޭޝަން (އިޔާރު) އާއި އިހަވަންދޫ ޕޮލިސް ސްޓޭޝަން ގުޅިގެން ރޭ 9:30 ގައި އިހަވަންދޫ މަދަރުސާގައި ބޭއްވި ދީނީ ދަރުސް ނިންމަވާލައްވަމުން ނެވެ. ރޭގެ ދަރުސް ކުރިއަށްދިޔައިރު މަދަރުސާ ހޯލުގެ ބޮޑު ބައެއް ހުސްކޮށް އޮތްއިރު ދަރުސް އަޑުއެހުމަށް ހާޒިރުވި ފިރިހެން ބޭފުޅުންގެ ޢަދަދު ވަރަށް މަދުކަން ފާހަގަ ކުރެވެއެވެ.
ޝެއިޚް ނަޞްރުﷲ ވިދާޅުވީ ރޭގެ ދަރުސް ދިން ހޯލުގައި ޝޯވ އެއް ދޭކަމުގައި ވަނީނަމަ މުޅި ހޯލު ފުރޭނެ ކަމަށެވެ. އަދި ދީނީ ނަޞޭހަތްދެވޭ މަޖިލިސް ތަކަށް މަލާއިކަތް ބޭކަލުން ފައިބާ ވަޑައިގެން އެމަޖިލީހުގައި ތިބި މީހުންނަށްޓަކައި ހެޔޮ ދުޢާ ކޮށްދޭނެ ކަމަށާއި، އެހެންކަމުން ދެން އޮންނަ އެފަދަ ބައްދަލުވުމަށް ރޭގެ ދަރުސަށް ހާޒިރުވި ކޮންމެ ބޭފުޅަކު އިތުރު ބޭފުޅަކު ގެނައުމަށް ޝެއިޚް އެދިލެއްވި އެވެ.
އިޔާރު އަދި އިހަވަންދޫ ޕޮލިސް ސްޓޭޝަން ގުޅިގެން މިމަހު 18 އިން 20 ށް ކުރިއަށް ގެންދިއުމަށް ހަމަޖެހިފައިވާ ދީނީ ދަރުސް ދިނުމުގެ ޕްރޮގްރާމްގައި މިރޭ ހއ. ތަކަންދޫގައި ދީނީ ދަރުސެއް ދޭގޮތަށް ވަނީ ހަމަޖެހިފައެވެ.
