ހއ. ބާރަށު ޞިއްޙީމަރުކަޒުގެ ނަން، އާމިނާ ރެހެންދި ސިއްޙީ މަރުކަޒުގެ ނަމަށް ބަދަލުކޮށްފިއެވެ. ބާރަށު ޞިއްޙީމަރުކަޒުގެ ނަން، އާމިނާ ރެހެންދި ސިއްޙީ މަރުކަޒުގެ ނަމަށް ބަދަލުކޮށްފައިވަނީ މިއަހަރުގެ ޤައުމީ ދުވަސް ކަމަށްވާ މިހިނގާ އޯގަސްޓް މަހުގެ 24 ވަނަ ދުވަހުން ފެށިގެންނެވެ.
އާމިނާ ރެހެންދިއަކީ ބާރަށު، ބޯށިވަލު ބުޅާ ފާޠިމާގެ ދަރި ކަނބަލުންނެވެ. ޢީދު ދުވަހު މުޙަންމަދު ތަކުރުފާނުގެ ބޮލަށް ގޮންޖެއްސެވީ އެކަމަނާއެވެ. ބަރަށު ކަމަނާ މަގަކީ، މުޙަންމަދު ތަކުރުފާނުގެ ބޮލަށް ގޮންޖެއްސެވުމުން އެކަމަނާ ގޮވައިގެން އިރުމަތީ ފުއްޓަރު ފަރާތަށް ގެންދިޔަ މަގުކަމަށް ބުނެވެއެވެ. ފުއްޓަރު ފަރާތުންއެރުއްވީ ކައިވެނި ކުރުމަށް އެއްބަސް ވެގެންކަމަށް ބުނެވެއެވެ. އަދި، ފުއްޓަރު ފަރާތުގައި ރެހެންދި ގޮއްޔެ މުޙަންމަދު ތަކުރުފާނު ކޮނޑަށް ލައިގެން ރާޅުގަނޑު ތެރެއަށް އެރިހުރި ދިމާ މިހާރުވެސް އޮޅެއްގެ ސިފާގައި ފާހަގަ ކުރެވޭކަމަށް ވެއެވެ. ތާރީހުން އެނގޭ ގޮތުގައި މުޙަންމަދު ތަކުރުފާނުވަނީ ދެ ބޭކަނބަލަކާއި ކައިވެނި ކުރައްވާފައެވެ. އެއީ އާމިނާ ރެހެންދި (އާމިނާ ރަނިކިލެގެފާނު) އަދި ޢަލީ ރަސްގެފާނުގެ ދަރިކަނބަލުން ސިއްތި މާވާ ރަނި ކިލެގެފާނެވެ.
ބާރަށު ޞިއްޙީމަރުކަޒުގެ ނަން، އާމިނާ ރެހެންދި ސިއްޙީ މަރުކަޒުގެ ނަމަށް ބަދަލުކޮށްފައިވާއިރު، އިހަވަންދޫ ސިއްހީ މަރުކަޒުގެ ނަން “އައިމިނާދިޔޯ ޞިއްޙީ މަރުކަޒު”ގެ ނަމަށް 2018 ވަނަ އަހަރުގެ ޖުލައި 17 ވަނަ ދުވަހު ބަދަލުކޮށްފައިވެއެވެ. އިހަވަންދޫ އާމިނާދިޔޯ އަކީ މުޙަންމަދު ތަކުރުފާނުގެ މަންމާފުޅެވެ.
