ފުލުހުންގެ އަސާސީ ތަމްރީނުގެ 37 ވަނަ ބެޗްގެ ހުރިހާ ގޮތަކުން އެންމެ މޮޅު ދަރިވަރަކަށް ކޮންސްޓަބަލް ހަސަން ޝާމިލް، ޝަބްންމްވިލާ ހއ. އިހަވަންދޫ ހޮވިއްޖެއެވެ.
ކޯސް ނިންމުމަށް މިރޭ ބޭއްވި ރަސްމިއްޔާތުގައި އޭނަ އަށް ކޮމިޝަނަ އޮފް ޕޮލިސް އެކްސެލެންސް އެވޯޑު ހަވާލުކޮށް ދެއްވީ ޕޮލިސް ކޮމިޝަނަރު އަލީ ޝުޖާއު އެވެ. ފުލުހުންގެ 37 ވަނަ އަސާސީ ތަމްރީނު ކޯހުގައި 171 ފުލުހުން ތަމްރީން ފުރިހަމަ ކޮށްފައިވެއެވެ.
ފުލުހުންގެ އަސާސީ ތަމްރީނު ކޯހަކީ ރާއްޖޭގެ ގާނޫނު އަސާސީން ދިވެހި ފުލުހުންގެ ޚިދުމަތަށް މަތިކޮށްފައިވާ ގާނޫނީ މަސްއޫލިއްޔަތު އަދާކުރުމަށާއި، ފުލުހެއްގެ މަސްއޫލިއްޔަތު އެންމެ އެދެވޭ ގޮތުގައި އަދާކުރުމަށް ބޭނުންވާ އަސާސީ ތަމްރީނާއި މުހިންމު ހުނަރާއި އިލްމު އަދި މައުލޫމާތު އުނގަންނައިދިނުމަށް ފަރުމާކޮށްގެން ކުރިއަށް ގެންދާ ކޯހެކެވެ.
އެގޮތުން، ގާނޫނާއި، ހިއުމަން ރައިޓްސް އާއި ދީނީ ވާޖިބުތަކާއި އިސްލާމީ ރިވެތި އަހުލާގު އަދި ދިވެހި ފުލުހުންގެ ޚިދުމަތުގެ ކޯޑް އޮފް ކޮންޑަކްޓާއި ކޯޑް އޮފް އެތިކްސް ފަދަ ބައިތައް މި ތަމްރީނު ކޯހުގައި ކުރިއަށް ގެންދެ އެވެ.
