އިހަވަންދޫގައި ދުއްވާ އެއްގަމު އުޅަނދުތަކުގެ ތެރެއިން (B) ޒޯނަށް ރަޖިސްޓަރީ ނުކުރާ އުޅަނދުތައް އެ ޒޯނަށް ބަދަލުކުރުމަށް އިހަވަންދޫ ކައުންސިލުން ދީފައިވާ މުއްދަތު، އަންނަ ސެޕްޓެމްބަރު މަހުގެ 20 ވާ ހޮނިހިރު ދުވަހުގެ 12:00 އަށް އިތުރުކޮށްފިއެވެ.
މިކަމާއި ގުޅިގެން އިހަވަންދޫ ކައުންސިލުން މިމަހުގެ 17 ވަނަ ދުވަހު ކޮށްފައިވާ އިޢުލާނެއްގައިވަނީ، ހއ. އިހަވަންދޫގައި މިވަގުތު ބޭނުންކުރަމުންދާ އެއްގަމު އުޅަނދުތަކުގެ ތެރެއިން ހއ. އިހަވަންދޫ ހިމެނޭ ޒޯން (B) އަށް ރަޖިސްޓްރީ ނުކޮށް ރަށުގައި ދުއްވާ އެންމެހައި އުޅަނދުތައް، (B) ޒޯނަށް ރަޖިސްޓްރީ ކުރުމަށް ދަންނަވާކަމުގައެވެ. މިގޮތުން، މުއައްސަސާތަކާއި، ކުންފުނިތަކާއި، އަމިއްލަ ވިޔަފާރިތަކާއި ޢާންމު ފަރުދުންގެ އުޅަނދުފަހަރުތައް (B) ޒޯނަށް ރަޖިސްޓްރީ ކުރުމަށް ކުރިން ދީފައިވާ 6 (ހައެއް) މަސްދުވަހުގެ މުހުލަތު އަންނަ މަހުގެ 29 ވާ ހޮނިހިރު ދުވަހަށް އިތުރުކޮށްފައިވާ ކަމަށް ވެއެވެ.
އިހަވަންދޫ ކައުންސިލުން ދީފައިވާ މުއްދަތުގައި (B) ޒޯނަށް ރަޖިސްޓަރީ ނުކުރާ އުޅަނދުތަކުގެ ވެރިފަރާތްތަކާއި މެދު “އެއްގަމުގައި ދުއްވާ އިންޖީނުލީ އުޅަނދު ރަޖިސްޓްރީކުރުމުގެ ޤަވާއިދު” ގެ 13 ވަނަ މާއްދާގެ ދަށުން ފިޔަވަޅު އެޅުމަށް އިހަވަންދޫ ޕޮލިސްޓޭޝަނަށް ފޮނުވޭނެކަމުގައި ކައުންސިލުން ހާމަކުރެއެވެ.
