ހއ. މޮޅަދޫ ކައުންސިލްގެ ރައީސް، މުޙައްމަދު ސިނާދު ދެވަނަ ދައުރަކަށް ކުރިމަތިލައްވާނެކަން އިއުލާންކުރައްވައިފިއެވެ.
އެކަން އިއުލާން ކުރައްވަމުން ސިނާދު ވިދާޅުވީ މިއިންތިހާބުގައިވެސް އެބޭފުޅާ ވާދަކުރައްވާނީ އެއްވެސް ސިޔާސީ ފިކުރަކަށް ބަރޯސާނުވެ ރަށުގެ މަޞްލަޙަތާއި ރައްޔިތުންގެ ލާބައަށް މަސައްކަތްކުރާނެ “މިނިވަން ކެނޑިޑޭޓެއް” ގެ ގޮތުގައި ކަމުގައެވެ. 2021 ވަނަ އަހަރު ބޭއްވި ލޯކަލް ކައުންސިލް އިންތިހާބުގައިވެސް ސިނާދު ވާދަކުރައްވާ އިންތިހާބު ކާމިޔާބުކުރެއްވީ މިނިވަން ކެނޑިޑޭޓެއްގެ ގޮތުގައެވެ.
2021 ވަނަ އަހަރު ބޭއްވި ލޯކަލް ކައުންސިލް އިންތިހާބުގައި، ސީނާދު ވާދަކުރެއްވީ އެމްޑީޕީ ކެނޑިޑޭޓް އަހްމަދު އަޝްރަފް އާއެވެ. އެއިންތިހާބު ސިނާދު ކާމިޔާބުކުރެއްވީ 3 ވޯޓްގެ ތަފާތުންނެވެ. އެއިންތިހާބުގައި އަޝްރަފް 121 ވޯޓް ހޯއްދެވިއިރު ސިނާދުވަނީ 124 ވޯޓް ހޯއްދަވައިފައެވެ. އަންނަ އޭޕްރީލް މަހުގެ 4 ވަނަ ދުވަހު ބާއްވާ ލޯކަލް ކައުންސިލް އިންތިހާބުގައި މޮޅަދޫއިން 307 މީހަކަށް ވޯޓްލުމުގެ ހައްޤު ލިބިގެން ވެއެވެ.
މޮޅަދޫ ކައުންސިލްގެ 4 ވަނަ ދައުރަށް ބަލާއިރު، ލޯކަލް ކައުންސިލް ޕާފޯމެންސް އިންޑެކްސްގައި އެކައުންސިލް އައީ އަހަރުން އަހަރަށް ކުރިއެރުން ހޯދަމުންނެވެ. އެގޮތުން ހއ. އަތޮޅު ކައުންސިލުންހޮވި 2024 ވަނަ އަހަރު ހއ އަތޮޅުގެ އެންމެ ހިންގުންތެރި ރަށު ކައުންސިލަށް ހޮވިފައިވަނީވެސް މޮޅަދޫ ކައުންސިލްކަން ފާހަގަކުރެވެއެވެ. މީގެއިތުރުން ރަށުގައި ތިބެގެން ބައިވެރިވެވޭފަދަ ކުރުމުއްދަތުގެ ތަމްރީން ޕްރޮގްރާމްތައް ހިންގުމާއި، ތަރައްޤީގެ އެކިއެކި ޕްރޮޖެކްޓްތައް ހިންގުމުގެ އިތުރުން، ހިންގުނު ޕްރޮޖެކްޓްތަކުން ކައުންސިލްގެ އާމްދަނީ އިތުރުކުރުމުގައި މޮޅަދޫ ކައުންސިލުން ކުރިއެރުންތަކެއް ހޯދާފައިވާކަން ފާހަގަކުރެވެއެވެ.
މޮޅަދޫއަކީ އާބާދީ މަދު ރަށެއްނަމަވެސް، މޮޅަދޫއަކީ މުޅިރާއްޖެއަށްވެސް މިހާރު މަޝްހޫރު ރަށެކެވެ. ގުދުރަތީ ހާއްސަ ސިފަތަކެއް ލިބިފައިވާ މޮޅަދޫ ތުނޑި އަދި ކުޅިއަކީ އެތައްބަޔަކަށް ހާއްސަ، ރަށުން ބޭރުން ގިނަބަޔަކު ޒިޔާރަތްކުރާ ތަންތަނެވެ.
