ހއ. މޮޅަދޫ ކައުންސިލުން އިސްނަގައިގެން އެ ރަށު އަންހެނުންގެ ތަރައްޤީއަށް މަސައްކަތްކުރާ ކޮމިޓީއާއި މޮޅަދޫ ސްކޫލް ގުޅިގެން ބާއްވާ “ނޫރު މަދަހަ މުބާރާތް” މި އަހަރު މުޅި އިހަވަންދިއްޕޮޅަށް ހުޅުވާލައިފިއެވެ.
މި މުބާރާތުގެ ފުރަތަމަ ދެ ސީޒަން، ހަމައެކަނި މޮޅަދުއަށް ޚާއްޞަކޮށްގެން ކުރިއަށް ގެންދިޔަ ނަމަވެސް، މިއަހަރު ބާއްވާ ތިންވަނަ ސީޒަން ވަނީ އިހަވަންދިއްޕޮޅުގެ ރަށްތައް ކަމަށްވާ ތުރާކުނު، އުލިގަން، ހޯރަފުށި އަދި އިހަވަންދޫގެ ރައްޔިތުންނަށްވެސް ބައިވެރިވެވޭ ގޮތަށް ފުރުޞަތު ފަހިކޮށްދީފައެވެ.
މި މުބާރާތުގައި ބައިވެރިވުމުގެ އުސޫލުތައް ހަމަޖެހިފައިވާ ގޮތުން، މޮޅަދޫ ފިޔަވައި އިހަވަންދިއްޕޮޅުގެ އެހެން ރަށްތަކުން ބައިވެރިވެވޭނީ އެ ރަށެއްގެ ރަށްވެހިންގެ ތެރެއިން އެ ރަށެއްގެ ކައުންސިލުން ކަނޑައަޅާ ތިން ބައިވެރިއަކަށެވެ. މޮޅަދޫއިން މިމުބާރާތުގައި ބައިވެރިވެވޭނީ އެ ރަށުގެ ރަށްވެހިންގެ އިތުރުން، ރަށްވެހިންގެ ދަރިންނާއި މޮޅަދޫ ރަށްވެއްސަކާ ކައިވެނިކޮށްގެން އުޅޭ ފަރާތްތަކަށެވެ. މީގެ އިތުރުން މޮޅަދޫ ސްކޫލާއި ލިޓްލް ސްޓަރގެ ހުރިހާ ދަރިވަރުންނަށްވެސް މި މުބާރާތުގައި ބައިވެރިވުމުގެ ފުރުޞަތު ވަނީ ހުޅުވާލާފައެވެ.
މުބާރާތުގެ ވަނަވަނައަށް ހޮވޭ ފަރާތްތަކަށް އަގުހުރި އިނާމުތަކެއް ހުށަހަޅާފައިވާއިރު، މުޅި މުބާރާތުން އެއްވަނައަށް ހޮވޭ ބައިވެރިއަކަށް އިނާމެއްގެ ގޮތުގައި އުމުރާ ދަތުރަކާއި 6000 ރުފިޔާ ދިނުމަށް ވަނީ ނިންމާފައެވެ. މި މުބާރާތުގައި ބައިވެރިވާން އެދޭ ފަރާތްތަކަށް ފޯމު ހުށަހެޅުމުގެ އެންމެ ފަހު ވަގުތަކީ މި ހިނގާ ފެބުރުއަރީ މަހުގެ 15 ވާ އާދިއްތަ ދުވަހުގެ މެންދުރުފަހު 13:00 އެވެ.
ނޫރު މަދަހަ މުބާރާތުގު ފުރަތަމަ ސީޒަންގައި އެކި އުމުރުފުރާތަކުން ޖުމުލަ 63 ބައިވެރިން މަދަހަ ހުށަހަޅާދީފައި ވާއިރު ދެވަނަ ސީޒަންގައިވަނީ ޖުމުލަ 56 ބައިވެރިން މަދަހަ ހުށަހަޅާދީފައެވެ. މިމުބާރާތުގެ ފުރަތަމަ ސީޒަންގެ އެއްވަނަ ހަސަން ޝިޔާމް ހޯދިއިރު ދެވަނަ ސީޒަންގެ އެއްވަނަ ހޯދީ މުހައްމަދު ނިޝާމް އެވެ. މިދިޔަ ދެ މުބާރާތެކޭ އެއްގޮތަށް މިއަހަރުގެ މުބާރާތް ކުރިޔަށް ގެންދާނީވެސް ދެ ބުރަކަށް ބަހާލައިގެންނެވެ. ފުރަތަމަ ބުރުން އެންމެ މަތިން މާކުސް ހޯދާ 10 ބައިވެރިން މިމުބާރާތުގެ ފައިނަލް ބުރަށް ދަތުރުކުރާނެއެވެ.
