ބިއުޓިފުލް ބްލޫ މައިކަޕް 2024، ފުޓްބޯޅަ މުބާރާތުގައި ބައިވެރިވުމުގެ ފުރުސަތު ހުޅުވާލައިފިއެވެ. މިމުބާރާތުގައި ބައިވެރިވުމުގެ ސުންގަޑިއަކީ އަންނަ ޑިސެމްބަރ މަހުގެ 1 ވަނަ ދުވަހެވެ.
މިއަހަރުގެ މައިކަޕް މުބާރާތުގައި، ބައިވެރިވުމުގެ ފުރުސަތު ހއ އަތޮޅުން ފެށިގެން ޅ އަތޮޅުގެ ރަށްތަކުގެ ސަރުކާރު މުއައްސަސާތަކާއި، އެންޖީއޯތަކާއި، ކުންފުނިތަކާއި، ރިސޯޓްތަކުގެ އިތުރުން އިހަވަންދޫގެ ޒުވާނުންނަށްވަނީ ހުޅުވާލައިފައެވެ. އެހެން އަހަރުތަކާއި ހިލާފަށް މިއަހަރު ބާއްވާ މައިކަޕް ފުޓްބޯޅަ މުބާރާތް ކުޅޭނީ އިލަވަން އަ ސައިޑް އުސޫލުންނެވެ.
މައިކަޕްގެ ބާނީއަކީ އިހަވަންދޫ ދާއިރާގެ ކުރީގެ މެމްބަރު މުހައްމަދު އަބުދުﷲ (މުހައްމާ) އެވެ. މުހައްމާވަނީ މިއަހަރުގެ މުބާރާތަށް އެއް މިލިއަނަށްވުރެ ގިނަ ރުފިޔާ ހަރަދުކުރާނެކަމުގެ ޔަގީންކަން ދެއްވާފައެވެ. މިއަހަރު ބާއްވާ މައިކަޕް ފުޓްބޯޅަ މުބާރާތުގެ ޓައިޓަލް ސްޕޮންސަރ ކޮށްފައިވަނީ ބިއުޓިފުލް ބްލޫއެވެ. ބިއުޓިފުލް ބްލޫއިން މުބާރާތުގެ ފޯރި ގަދަކުރުމަށް ތަފާތު ހަރަކާތްތަކެއް ކުރިޔަށް ގެންދާނެކަންވަނީ އިއުލާންކޮށްފައެވެ. އެގޮތުން މިމުބާރާތުގައި ބައިވެރިވާ އިހަވަންދޫގެ ކޮންމެ ޓީމަކަށް އެހީތެރިވުމުގެ ގޮތުން 2000ރ ގެ ސްޕޮންސަރ އެއް ދިނުމާއި، މުބާރާތް ފެށުމުގެ ކުރިން މައިކަޕްގެ 200 ޖާޒީ ހިލޭ ސަޕޯޓަރުންނަށް ދޫކުރާނެކަމަށްވެސް، ބިއުޓިފުލް ބުލޫގެ އޯނަރު ޔާމީންވަނީ އިއުލާން ކޮށްފައެވެ.
މިއަހަރު ބާއްވަނީ މައިކަޕްގެ، 14 ވަނަ މުބާރާތެވެ. މައިކަޕަކީ އެމުބާރާތަކަށް ސަރަހައްދުގެ ކުޅުންތެރިން އެންމެ އިންތިޒާރުކުރާ އެއްމުބާރާތެވެ. އިހަވަންދޫގައި ޒަމާނީވަންތަކޮށް އަގުބޮޑެތި މުބާރާތްތައް ބޭއްވުމުގެ ސިލްސިލާ ފެށިގެންއައީވެސް މައިކަޕުންނެވެ. މިއަހަރުގެ މައިކަޕް މުބާރާތުގެ ޗެމްޕިއަން ޓީމަށް 100،000ރ ހުށަހަޅާފައިވާއިރު، ފަސްޓް ރަނާރސް އަޕް ޓީމަށް، 35،000ރ ވަނީ ހުށަހަޅާފައެވެ.
