ވޮލީބޯލް އެސޯސިއޭޝަން އޮފް މޯލްޑިވްސްއިން ކުރިޔަށްގެންދާ އިންޓަރސްކޫލް ވޮލީ މުބާރާތުގެ ފައިނަލް ރައުންޑްގެ ސެމީ ފައިނަލްގައި، ފާފު އަތޮޅު އެޑިއުކޭޝަން ސެންޓަރު އަތުން ބަލިވެ އިހަވަންދޫ ސްކޫލްގެ 19 އަހަރުން ދަށުގެ އަންހެން ޓީމަށް ފައިނަލަށް ދިއުމުގެ މަގު ބަންދުވެއްޖެއެވެ. މިމެޗުން ފާފު އަތޮޅު އެޑިއުކޭޝަން ސެންޓަރު މޮޅުވީ 2 ސެޓް 1 ސެޓުންނެވެ. އިހަވަންދޫ ސްކޫލްގެ 19 އަހަރުން ދަށުގެ އަންހެން ޓީމް ދެން ކުޅެންޖެހޭނީ 3 ވަނަ ހޮވާ މެޗްގައެވެ. މާދަމާ ހަވީރު 16:30 ފަށާ އެމެޗްގައި، އިހަވަންދޫ ސްކޫލް ނުކުންނާނީ ކޮޔޮދޫ ސްކޫލާއި ދެކޮޅަށެވެ.
ފައިނަލް ރައުންޑްގައި ވާދަކުރާ އިހަވަންދޫ ސްކޫލްގެ 19 އަހަރުން ދަށުގެ ފިރިހެން ޓީމްވަނީ މިމުބާރާތުގެ ފައިނަލުން ޖާގަ ހޯދައިފައެވެ. މިރޭ ކުޅުނު ސެމީ ފައިނަލް މެޗުން މީމު އަތޮޅު އެޑިއުކޭޝަން ސެންޓަރުގެ މައްޗަށް އެޓީމް ކުރި ހޯދީ 2 ސެޓް 1 ސެޓުންނެވެ. ފައިނަލްގައި އަންނަ ހުކުރު ދުވަހުގެ ރޭ 20:00 ގައި އިހަވަންދޫ ސްކޫލްގެ 19 އަހަރުން ދަށުގެ ފިރިހެން ޓީމް ނުކުންނާނީ ސީއެޗް އެސްއީ ހުޅުމާލެ އާއި ދެކޮޅަށެވެ.
މިމުބާރާތުގައި އިހަވަންދޫ ސްކޫލުން ބައިވެރިކުރީ ދެ ޓީމެވެ. އެއީ 19 އަހަރުން ދަށުގެ އަންހެން ޓީމަކާއި 19 އަހަރުން ދަށުގެ ފިރިހެން ޓީމެކެވެ. 19 އަހަރުން ދަށުގެ ފިރިހެންޓީމް ފައިނަލް ރައުންޑްގެ ފައިނަލަށް ދަތުރު ކޮށްފައިވާއިރު، އެޓީމްވަނީ އަތޮޅު ކެޓަގަރީގެ ޗެމްޕިއަންކަން ހޯދައިފައެވެ. 19 އަހަރުން ދަށުގެ އަންހެންޓީމަށް އަތޮޅު ކެޓަގަރީގެ ވަނަޔަކަށް ވާދަނުކުރެވުނު ނަމަވެސް، ފައިނަލަށް ރައުންޑްގެ 3 ވަނަ ހޮވާ މެޗްގައި ކުޅުމުގެ ފުރުސަތު ވަނީ ލިބިފައެވެ.
މިއީ މާލޭގައި ބާއްވާ އިންޓަރ ސްކޫލް ވޮލީމުބާރާތެއްގައި އިހަވަންދޫ ސްކޫލް ބައިވެރިވާ ފުރަތަމަ ފަހަރުކަން ފާހަގަކުރެވެއެވެ.
