ވޮލީބޯލް އެސޯސިއޭޝަން އޮފް މޯލްޑިވްސްއިން ކުރިޔަށްގެންދިޔަ އިންޓަރސްކޫލް ވޮލީ މުބާރާތުގައި، ބައިވެރިވި އިހަވަންދޫ ސްކޫލްގެ ވޮލީ ޓީމްތަކުން ހޯދި ކާމިޔާބީ ފާހަގަކުރުމަށް ހަފްލާއެއް ބާއްވައިފިއެވެ. ރޭ އިހަވަންދޫ ސްކޫލްގައި ބޭއްވި މިހަފްލާ ކުރިޔަށް ގެންގޮސްފައިވަނީ “ރަންވަން އުފާ” ގެ ނަމުގައެވެ.
ރޭގެ ހަފްލާގައި، މިމުބާރާތުން އިހަވަންދޫ ސްކޫލަށް ލިބުނު ތައްޓާއި އައްޑަނަ ސްކޫލާއި ރަސްމީކޮށް ހަވާލުކުރުން އޮތެވެ. އަދި އިހަވަންދޫ ސްކޫލުން މިމުބާރާތުގައި ބައިވެރިވި ދަރިވަރުންނާއި، ދެ ޓީމްގެ ކޯޗިން ސްޓާފުންގެ އިތުރުން އޮފިޝަލުންނަށްވަނީ ރޭގެ ރަސްމިއްޔާތުގައި ހަދިޔާ ދީފައެވެ. މީގެ އިތުރުން ޓީމަށް އެކި އެކި ގޮތްގޮތުން އެހީތެރިވި ފަރާތްތަކަށް ރޭގެ ހަފުލާގައިވަނީ ހަދާނީ ލިޔުން ދީފައެވެ. އިހަވަންދޫގެ މުއައްސަސާތަކާއި ސަރުކާރުގެ ކުންފުނިތަކުން އިންތިޒާމް ކޮށްގެން ކުރިޔަށް ގެންދިޔަ ރޭގެ ހަފުލާ ޝަރަފްވެރިކޮށްދެއްވީ އިހަވަންދޫ ސްކޫލްގެ ކުރީގެ ނާޒިރު، އަދުނާނު އަބުދުﷲ އެވެ.
ވޮލީބޯލް އެސޯސިއޭޝަން އޮފް މޯލްޑިވްސްއިން ކުރިޔަށްގެންދިޔަ އިންޓަރސްކޫލް ވޮލީ މުބާރާތުގައި، އިހަވަންދޫ ސްކޫލުން ބައިވެރިވެފައިވަނީ ދެ ޓީމެކެވެ. އެއީ 19 އަހަރުން ދަށުގެ އަންހެން ޓީމަކާއި 19 އަހަރުން ދަށުގެ ފިރިހެން ޓީމެކެވެ. އިހަވަންދޫ ސްކޫލްގެ 19 އަހަރުން ދަށުގެ އަންހެން ޓީމްވަނީ އެއުމުރުފުރައިގެ 3 ވަނަ ހޯދައިފައެވެ. އިހަވަންދޫ ސްކޫލްގެ 19 އަހަރުން ދަށުގެ ފިރިހެން ޓީމްވަނީ ފިރިހެން ޑިވިޜަންގެ ޗެމްޕިއަން ކަމާއި، އަތޮޅު ކެޓަގަރީގެ ޗެމްޕިއަންކަންވެސް ހޯދައިފައެވެ.
މިއީ މިމުބާރާތުގައި އިހަވަންދޫ ސްކޫލް ބައިވެރިވި ފުރަތަމަ ފަހަރެވެ. އިހަވަންދޫގައި ވޮލީ ކުޅުމަށް ފުރިހަމަ ވަސީލަތައް ނެތްނަމަވެސް، އިހަވަންދޫ ސްކޫލުން މިމުބާރާތުގައި ވާދަކުރި ދެ ޓީމްވެސްވަނީ ރަނގަޅު މޮޅު ކުޅުމެއް ދައްކައިފައެވެ. ވަރަށް ފޯރިގަދަ ވޮލީ މުބާރާތްތަކެއް ކުރިން ، އިހަވަންދޫ ސްކޫލްގެ ހައުސްތަކުގެ މެދުގައި ބޭއްވިނަމަވެސް، ސްކޫލް ފެންވަރުގައި ވޮލީ މުބާރާތެއް ނުބާއްވާތާ މިހާރު އެތައް އަހަރެއް ވެއްޖެއެވެ.
މިމުބާރާތަށް ދަރިވަރުން ފޮނުވުމަށް އިހަވަންދޫ ސްކޫލުންވަނީ ގިނަގުނަ މަސައްކަތްތަކެއް ކޮށްފައެވެ. އެގޮތުން ސްކޫލްގެ ޕީޓީއޭއިން ފަންޑްރައިސިންގް ހަރަކާތްތަކެއް ކުރިޔަށް ގެންދިއިރު، އިހަވަންދޫ ކައުންސިލުން އަދި އަންހެނުންގެ ކޮމިޓީއިންވެސް ވަނީ ފައިސާގެ އެހީތެރިކަން ދީފައެވެ. މީގެއިތުރުން އިހަވަންދޫ ދާއިރާގެ އިއްޒަތްތެރި މެމްބަރު އަހުމަދު ނަސީރު، އަދި އެކިއެކި ފަރާތްތަކުންވަނީ ޓީމަށް ހިތްވަރު ދިނުމަށް އެކިއެކި ހަރަކާތްތައް ކުރިޔަށް ގެންދިއުމުގެ އިތުރުން ފައިސާގެ އެހީތެރިކަންވެސް ދީފައެވެ. ފައިނަލް މެޗްގައި އިހަވަންދޫ ޓީމުގެ ސަޕޯޓަރުން ޓީމަށް ދިން ސަޕޯޓަކީވެސް ޓީމަށް ލިބިގެންދިޔަ ބޮޑު ހިއްވަރެއްކަން ޔަޤީނެވެ.
