މިދިޔަ 2024 އަހަރުގެ ސެޕްޓެމްބަރ މަހުގެ 15 ވަނަ ދުވަހުގެ ރޭ، އެމްޕީއެލްގެ ސީއީއޯ މުޙައްމަދު ވަޖީހު އިބްރާހިމް ޕީއެސްއެމް ނިއުސްގެ “ރާއްޖެ މިއަދު” ޕްރޮގްރާމުގައި ވާހަކަދައްކަވަމުން ވިދާޅުވީ، ރާއްޖޭގެ އުތުރުގައި ފެށުމަށް ހަމަޖެހިފައިވާ ބަންކަރިން ޚިދުމަތުގެ ދެވަނަ ފިޔަވަހީގެ ދަށުން، ޑީޕް ސީ މެއިންޓަނެންސަށް ހާއްސަ ޓަރމިނަލަކާއި ޑޮކްޔާޑެއް، އިހަވަންދޫގައި ތަރައްޤީ ކުރާނެ ކަމުގައެވެ.
19 ސެޕްޓެމްބަރ 2024 ގައި ބޮޑުރަސް މިއްޔާތެއް ބާއްވައި އުތުރުގައި އިންޓަނޭޝަނަލް ބަންކަރިންގެ ހިދުމަތްފެށިފަހުން، އެކަމުން ސީދާ އިހަވަންދޫއަށް ފައިދާއެއް ވާނެކަމަށް ބެލެވުނީ ޑޮކްޔާޑު ތަރައްޤީކުރުމުގެ ވާހަކަ ދެކެވެންފެށި ހިސާބުންނެވެ. މި މަޝްރޫޢުގެ ސަބަބުން އިހަވަންދޫގެ އިޤްތިޞާދަށާއި ވަޒީފާގެ ފުރުޞަތުތައް އިތުރުވުމަށް ގޮންޖެހުމެއް ލިބޭނެކަމަށް އުންމީދު ކުރެވުނެވެ.
ސީއީއޯ މުޙައްމަދު ވަޖީހު އިބްރާހިމް ވިޑާޅުވި ވާހަކަ ހަޤީގީ ސިފަ ޖެހިދާނެކަމުގެ ކުލަވަރު ފެންނަންފެށީ، މިދިޔަ 2024 އަހަރުގެ ސެޕްޓެމްބަރ މަހުގެ 20 ވަނަ ދުވަހު، ޑޮކްޔާޑާއި ސްލިޕްވޭ ތަރައްޤީކުރުމުގެ އެމްއޯޔޫ އެއްގައި އެމްޕީއެލްއާއި އިހަވަންދޫ ކައުންސިލާއި ދެމެދު ސޮއެކުރި ހިސާބުންނެވެ. ރައްޔިތުން، އެމީހުން ދެކެމުންދިޔަ ހުވަފެންތަކުގައި ކުލަޖެހެން ފެށިތަން ބަލަން ތިބީ އުފަލުންނެވެ.
އޭގެ ތިން މަސް ފަހުން، މިދިޔަ އަހަރުގެ ޑިސެމްބަރ މަހުގެ 20 ވަނަ ދުވަހަކީ އިހަވަންދޫގެ ތާރީހުގައި ފާހަގަކޮށްލެވޭނެ ދުވަހެކެވެ. އެދުވަހުވަނީ މޯލްޑިވްސް ޕޯޓްސް ލިމިޓެޑް (އެމްޕީއެލް) އިން އިހަވަންދޫގައި ޑޮކްޔާޑެއް ތަރައްޤީކުރުމުގެ އެއްބަސްވުމުގައި އިހަވަންދޫ ކައުންސިލާއިއެކު ސޮއެކޮށްފައެވެ. އެމްޕީއެލްގެ ފަރާތުން އެ އެއްބަސްވުމުގައި ސޮއެކުރެއްވީ އޭރު އެކުންފުނީގެ ސީއީއޯ މުޙައްމަދު ވަޖީހު އިބްރާހިމް އެވެ. އިހަވަންދޫ ކައުންސިލްގެ ފަރާތުން މިއެއްބަސްވުމުގައި ސޮއެކުރެއްވީ އިހަވަންދޫ ކައުންސިލްގެ ރައީސް އަޙްމަދު ސޮބާހްއެވެ.
ނަމަވެސް 02 ފެބްރުއަރީ 2025 ގައި މޯލްޑިވްސް ޕޯޓްސް ލިމިޓެޑްގެ މެނޭޖިން ޑިރެކްޓަރު ކަމުގެ މަގާމުން މުހައްމަދު ވަޖީހު އިބްރާހީމް، ވަކިކުރި ހިސާބުން އިހަވަންދޫގައި ތަރައްޤީކުރަން އެއްބަސްވި ޑޮކްޔާޑުގެ ވާހަކަ އޮބިއްޖެއެވެ. އެކަމުގެ އެއްވެސް އަމަލީ މަސައްކަތެއް ހިނގާތަނެއްވެސް ނުފެނެއެވެ.
އެމްޕީއެލް އާއި ކައުންސިލާއި ދެމެދު އެއްބަސްވުމުގައި ސޮއެކުރި ރަސްމިއްޔާތުގައި އިހަވަންދޫ ކައުންސިލްގެ ރައީސް ވަރަށް މުހިއްމު ވާހަކަތަކެއް ދެއްކެވިއެވެ. އިހަވަންދޫ ރައީސްގެ ހައިސިއްޔަތުން ކޮންމެހެން ދައްކަވަންޖެހޭ ވާހަކަތަކެކެވެ. ހިނގަމުންދާ ކައުންސިލްގެ 4 ވަނަދައުރުގައި ކައުންސިލުން ގިނަކަންކަމަށް ކުންފުނިތަކަށާއި ސަރުކާރުގެ މިނިސްޓްރީތަކަށް ބިން ދޫކުރި ނަމަވެސް އަމަލީ މަސައްކަތް ނުފެށި، ކައުންސިލުން ކުރަންޖެހުނު ހިތި ތަޖުރިބާތަކުގެ ވާހަކަ، ތަފްސީލާއިއެކު ސޮބާހް ވިދާޅުވިއެވެ.
ކައުންސިލަށް ކުރެވުނު ތަޖްރިބާއަށް ބަލާފައި، އެމްޕީއެލްއަށް ޑޮކްޔާޑް ހަދަން ބިން ހަވާލުކުރުމުގައި ބޮޑަށް ބެއްލެވީ ބިން ދޫކުރުމަށްފަހު އަވަހަށް މަސައްކަތް ފެށޭނެކަން ޔަޤީން ކުރައްވަން ކަމުގައި ސޮބާހް ވިދާޅުވިއެވެ. އެގޮތުން ކުރިން ހަމަ އެސަރަހައްދުގައި ބޯޓް ޔާޑެއް ތަރައްޤީކުރުމަށް، މޯލްޑިވްސް ޓުރާންސްޕޯރޓް އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ) އަށް ބިން ދޫކުރެވުނުކަން ފާހަގަކުރައްވިއެވެ. އަދި އެކަމުގެ އެއްވެސް އަމަލީ މަސައްކަތެއް ނުފެށުމުން އެމް.ޓީ.ސީ.ސީ އާއި އެކު ހަދާފައިވާ އެއްބަސްވުން އުވާލިކަން ފާހަގަކުރައްވައި ސޮބާހް ވިދާޅުވީ، މިއެއްބަސްވުމުގެ ދަށުން އެމްޕީއެލް އާއި ހަވާލުކުރީ ކުރިން އެމް.ޓީ.ސީ.ސީއާއި ހަވާލުކުރި ބިންކަމުގައެވެ. އަދި އެބިން އެމްޕީއެލްއަށް ދޫކޮށްފައިވަނީ 50 އަހަރުގެ މުއްދަތަށް ފީއެއް ނުނަގާ ގޮތަށްކަމަށް ސޮބާހް ވިދާޅުވިއެވެ.
ސޮބާހްގެ ވާހަކަޔަކަށް އިޝާރާތް ކުރައްވައި އެމްޕީއެލްގެ ސީއީއޯ މުޙައްމަދު ވަޖީހު އިބްރާހިމް އެދުވަހުގެ ރަސްމިއްޔާތުގައި ވިދާޅުވީ، އިހަވަންދޫ ކައުންސިލަށް ކުރިން ކުރެވުނު ހިތި ތަޖްރިބާ ތަކުރާރުނުވާނެ ގޮތަކަށް ކަންކަން އިންތިޒާމްކުރަން އެކުންފުނިން އިސްކަން ދޭކަމަށާއި އެގޮތުން އަންނަ މަހު (ޖެނުއަރީ 2025) ޑޮކްޔާޑުގެ ތަރައްޤީކުރުމުގެ އަމަލީ މަސައްކަތް ފެށޭނެކަމުގެ ޔަޤީންކަން ވަޖީހު ދެއްވިއެވެ. ނަމަވެސް 02 ފެބްރުއަރީ 2025 ގައި ވަޖީހު މަޤާމުން ވަކިކުރެއްވި އިރުވެސް އެކަމުގެ އަމަލީ އެއްވެސް މަސައްކަތެއް ހިނގާދިޔަތަނެއް ނުފެނުނެވެ. ސޮއެކުރި އެއްބަސްވުމަށް އަހަރެއްވާން ދާއިރުވެސް އަމަލީ އެއްވެސް މަސައްކަތެއް ހިނގާތީއެއް އަދިވެސް ނުފެނެއެވެ.
އިހަވަންދޫ ކައުންސިލަށް މިޖެހުނީ ކުރިންވެސް ޖެހުނު ހާލެވެ. ބިން ދޫކޮށް ބިމުގައި މަސައްކަތެއް ނުފެށި އޮންނަތަން ބަލަން ތިބޭށެވެ.
