ގޯލްޑެން ފުޓްސަލް ޗެލެންޖު 2025 ގައި، އިހަވަންދޫ ފުޓްސެލް ޓީމް ކުޅުނު ތިންވަނަ މެޗްގައި، ދިއްދޫ އަތުން ބަލިވެ އިހަވަންދޫ ކަޓައިފިއެވެ. މިރޭގެ މެޗުން އިހަވަންދޫ ބަލިވީ 6-1 އިންނެވެ. މެޗްގެ މޮޅު ކުޅުންތެރިޔާއަށް ހޮވުނީ ދިއްދޫ ޓީމްގެ ހުސައިން ޝިފާންއެވެ. އޭނާވަނީ މިމެޗްގައި 2 ގޯލް ޖަހައިފައެވެ.
މިމުބާރާތުގައި އިހަވަންދޫ މިހާތަނަށްވަނީ 3 މެޗް ކުޅެފައެވެ. އޭގެތެރެއިން ދެ މެޗުން ބަލިވެފައިވާއިރު 1 މެޗު ނިމުނީ އެއްވަރުވެގެންނެވެ. ހއ އަތޮޅު ބުރުގެ މެޗްތައް ކުރިޔަށް ގެންދަނީ ދެ ގްރޫޕަކަށް ބަހާލައިގެންނެވެ. އިހަވަންދޫ ހިމެނެނީ ގްރޫޕް ބީ ގައެވެ. ގްރޫޕް ބީގައި ހިމެނެނީ އިހަވަންދޫގެ އިތުރުން، މުރައިދޫ، ދިއްދޫ، ވަށަފަރު އަދި އުތީމެވެ. ގްރޫޕް އޭ ގައި ހިމެނެނީ ހޯރަފުށި، ބާރަށް، ކެލާ، މާރަންދޫ އަދި ފިއްލަދޫއެވެ. ކޮންމެ ގްރޫޕަކުންވެސް އެއްވަނަ އަދި ދެވަނަ ހޯދާ ދެ ޓީމް ކުޅޭނީސެމީ ފައިނަލަށް ދަތުރުކުރާނެއެވެ.
އިހަވަންދޫ ޓީމަށް އަދި ބާކީ އެއް މެޗް އެބައޮތެވެ. އެމެޗްގައި އިހަވަންދޫ ޓީމް މިމަހުގެ 21 ވާ އަންގާރަ ދުވަހުގެ ހަވީރު 17:00 ގައި ކުޅޭނީ ވަށަފަރާއި ދެކޮޅަށެވެ.
