އިހަވަންދޫ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫޢު، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާއި ހަވާލުކުރިތާ 1560 ދުވަސްވެފައިވާއިރުވެސް އެމަސައްކަތް ނިންމައި ނުލެވޭކަން ހާމަވެއްޖެއެވެ.
365 ދުވަހުން ނިންމާގޮތަށް، 123,960,847.77 ރުފިޔާގެ އަގަކަށް ހަވާލުކުރި މިމަސައްކަތުގެ އަދި ނިމިފައިވަނީ %98 މަސައްކަތް ކަމަށް އެމްޓިސީސީ އިން ހާމަކުރެއެވެ. މިދިޔަ އަހަރުގެ ނޮވެމްބަރުމަހުގެ 18 ވަނަދުވަހު އެމްޓީސީއިން މިނޫހަށް މައުލޫމާތު ދީފައިވަނީ، 2024 ވަނަ އަހަރުގެ ނިޔަލަށް އެމަސައްކަތް ނިންމުމަށް މަސައްކަތްކުރަމުން އަންނަކަމުގައެވެ. ނަމަވެސް މިހާތަނަށް އައިއިރުވެސް އެމަސައްކަތް ނިންމާފައެއްނުވެއެވެ.
އެމްޓީސީއިން ހާމަކޮށްފައިވާ ގޮތުގައި، އިހަވަންދޫ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫޢުގެދަށުން މިހާރުވަނީ 25.5 ހެކްޓަރުގެ ބިންހިއްކައި 1504 މީޓަރުގެ ރިވެޓްމެންޓް ޖަހައިފައެވެ. ބިއްހިއްކުމުގެ މަސައްކަތުގައި މިހާރު ނުނިމިވަނީ ބިން ހިއްކާފައިވާ ސަރަހައްދުގެ ފަސްގަނޑު ލެވަލް ކުރުމުގެ މަސައްކަތެވެ.
