އިހަވަންދޫގައި ހަދާ ކޯލްޑް ސްޓޭޖް ފެސިލިޓީގެ ބަނދަރު ހެދުމަށް އެމްޓީސީސީ އިން، ކަޓަރ ސެކްޝަން ޑްރެޖަރ ބޭނުންކޮށްގެން ފަޅު ފުންކުރުމުގެ ސަބަބުން، އިހަވަންދޫގެ އިރުމަތީ ފަރާތަށް ދިމާވެފައިވާ ތިމާވެށީގެ މައްސަލަތައް އީޕީއޭގެ ސަމާލުކަމަށް އިހަވަންދޫ ކައުންސިލުން ގެނެސްފިއެވެ.
އިހަވަންދޫ ކައުންސިލްގެ 3 ވަނަ ދައުރުގެ ރައީސް މުހައްމަދު ރަޝީދު ސޯޝަލް މީޑިއާގައިވަނީ އިހަވަންދޫ ކައުންސިލުން އީޕީއޭއަށް ފޮނުވާފައިވާ ސިޓީ ލީކް ކޮށްލާފައެވެ. އެސިޓީގެ ސައްހަކަން މިނޫހަށްވަނީ ކަށަވަރު ކުރެވިފައެވެ.
އިހަވަންދޫ ކައުންސިލްގެ ސިޓީގައިވަނީ އެމްޓީސީސީ އިން ފަޅު ފުންކޮށްފައިވަނީ ކީވޯލް ނުޖަހައި، ޝީޓް ޕައިލް ނުކޮށްކަމަށާއި، ރައްކާތެރިކަމުގެ ގޮތުން ކުރަންޖެހޭ ކަންކަން ކޮށްފައި ނުވާކަން ފާހަގަ ކުރެވޭ ކަމުގައެވެ. “މިގޮތުން، ފަޅު ފުންކުރުމުގެ ތެރެއިން ނެގުނު ވެއްޔަކީ ދެ މޫސުމަށް އިހަވަންދޫ އިރުމަތީ ފަރާތުގައި ވޮޑޭ ފަސްގަނޑުން ނެގިފައިވާ ފަސްކަމާއި މިފަސް ރަށުގެ ބިން ހިއްކުމުގެ މަޝްރޫޢު ނިންމުމަށް ބޭނުންކޮށްފައިވާކަން ފާހަގަކުރަމެވެ.” އިހަވަންދޫ ކައުންސިލުން ފޮނުވި ސިޓީގައި ވެއެވެ. އެކަމުގެ ނަތީޖާއެއްގެ ގޮތުން އިރުމަތީ ފަރާތް އާދަޔާހިލާފަށް ގިރާކަން ފާހަގަކޮށް، ގާތް ގަނޑަކަށް 712 މީޓަރުގެ ގިރާފައިވާކަން ފާހަގަކޮށް އިހަވަންދޫ ކައުންސިލުން ބުނެފައިވަނީ، ރަށުގެ ހޭޅިފަށާއި ރުއްގަސްތައް އަދި އެސަރަހައްދުގައި 100 އެއްހާ ފޫޓް ކައިރީގައި ދިރިއުޅެމުންދާ ފަރާތްތަކަށް އެކަމުގެ އަސަރު ކުރަމުންދާ ކަމުގައެވެ. މީގެއިތުރުން މިކަމުގެ ސަބަބުން ރައްގިރުން ހައްލު ކުރުމަށް ޓަކައި ރަށުގެ އިރު ދެކުނު ކަނމަތީ ޖަހާފައިވާ ރިވެޓްމެންޓްވެސް ރޫޅެމުންދާކަން ފާހަގަ ކޮށްފައިވެއެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން އިހަވަންދޫ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫޢު އަދި އިހަވަންދޫ ފިޝް ކަލެކްޝަން ސެންޓަރަށް ބޭނުންވާ ބަނދަރު ހެދުމުގެ މަސައްކަތް ކުރަމުންދަނީވެސް، އެކަންކަމަށް ހަދާފައިވާ އީއޭއައި ރިޕޯޓްތަކާއި ހިލާފަށްކަން ފާހަގަކުރެވެއެވެ.
