ހއ. އިހަވަންދޫގެ ސިއްހީ ހިދުމަތުގެ ތާރީޚުގައި އާ ސަފުހާއެއް އުފަންކޮށް، އެ ރަށުގައި ގާއިމުކުރި ފުރަތަމަ އަމިއްލަ މެޑިކަލް ކުލިނިކް ކަމަށްވާ “ޕަލްސް ޕޮއިންޓް މެޑިކަލް ސެންޓަރު” ގެ ހިދުމަތްތައް މިއަދު ރަސްމީކޮށް ފަށައިފިއެވެ.
ކުލިނިކުގެ ހިދުމަތްތައް ފެށުމުގެ ގޮތުން އެންމެ ފުރަތަމަ އިސްކަމެއް ދީފައިވަނީ ދަތުގެ ހާއްސަ ފަރުވާތަކަށެވެ. އެގޮތުން، ދާއިރާގެ ތަޖުރިބާކާރު ޑަކްޓަރުންގެ އެހީތެރިކަމާއެކު، ދަތުގެ އެކްސްރޭ ނެގުމާއި، ދަތް ސާފުކޮށްދިނުމުގެ އިތުރުން، ދަތުގެ ނަރުގަނޑު އެޅުވުމާއި ދަތުގެ އެކި ބާވަތުގެ އުނދަގޫ ފަރުވާތައް މިހާރު އެ ސެންޓަރުން ލިބިގެންދާނެއެވެ. ކުލިނިކުގެ ވެރިފަރާތުން މައުލޫމާތު ދޭ ގޮތުގައި، މި ހިދުމަތްތައް ދިނުމުގައި ބޭނުންކުރަމުންދަނީ އެންމެ ފަހުގެ ޒަމާނީ ވަސީލަތްތަކާއި މެޝިނަރީޒްއެވެ.
ކުލިނިކް ހުޅުވުމުގެ ގޮތުން ރައްޔިތުންނަށް ލުއިފަސޭހަ ކޮށްދިނުމަށް ވަރަށް ހާއްސަ ޕްރޮމޯޝަންތަކެއް ވަނީ އިއުލާނުކޮށްފައެވެ. އެގޮތުން، މި ހިނގާ ޖެނުއަރީ މަހުގެ 22 ވަނަ ދުވަހުގެ ނިޔަލަށް ކުލިނިކަށް ދައްކާ އެއްވެސް ބަލިމީހެއްގެ އަތުން ޑަކްޓަރަށް ދެއްކުމުގެ ފީއެއް ނުވަތަ ކޮންސަލްޓޭޝަން ފީއެއް ނުނަގާނެއެވެ. މީގެ އިތުރުން، މުޅި ޖެނުއަރީ މަސް ނިމެންދެން ކުރިއަށްދާ ބޮޑު ޕްރޮމޯޝަންގެ ދަށުން، ކުލިނިކުން ދޭ އެކި ހިދުމަތްތަކުން 20 އިންސައްތައާ ހަމައަށް ބޮޑު ޑިސްކައުންޓެއް ލިބިގެންދާނެއެވެ.
ކުލިނިކުގެ ހިދުމަތްތައް ފުޅާކުރުމާ ގުޅޭގޮތުން ވާހަކަދައްކަވަމުން ވެރިފަރާތުން ބުނީ، މިވަގުތު ދަތުގެ ފަރުވާތަކަށް ހާއްސަވި ނަމަވެސް، އަންނަ ފެބުރުވަރީ މަހުން ފެށިގެން އެކި ދާއިރާތަކުގެ ހާއްސަ ސްޕެޝަލިސްޓް ޑަކްޓަރުން ކުލިނިކުގައި ބަލިމީހުން ބައްލަވަމުން ގެންދަވާނެ ކަމަށެވެ. އަދި ރާއްޖޭގައި ތިބެގެން ބޭރުގެ ފަރުވާ ބޭނުންވާ ފަރާތްތަކަށް އަމާޒުކޮށްގެން، އިންޑިއާގެ ތަޖުރިބާކާރު ޑަކްޓަރުންގެ އިރުޝާދާއި ލަފާ އޮންލައިންކޮށް ހޯދޭނެ “ޓެލެ-މެޑިސިން” ގެ ހިދުމަތްވެސް އެ ސެންޓަރުން ވަނީ ފަށައިފައެވެ.
ޕަލްސް ޕޮއިންޓް މެޑިކަލް ސެންޓަރުން ފަރުވާ ހޯދުމަށް އެޕޮއިންޓްމެންޓް ހެއްދެވުމަށް ނުވަތަ އިތުރު މައުލޫމާތު ސާފުކުރެއްވުމަށް 7433301 ނަންބަރު ފޯނާ ގުޅުއްވުމަށް އެކުލިނިކުން އެދެއެވެ.
އިހަވަންދޫގައި މިފަދަ ކުލިނިކެއް ގާއިމްވުމަކީ، ރަށުގެ ރައްޔިތުންނަށް ސިއްހީ ފަރުވާ ހޯދުމަށްޓަކައި އެހެން ރަށްރަށަށް ކުރަންޖެހޭ ދަތުރުތައް މަދުވެ، އަމިއްލަ ރަށުގައި ތިބެގެން އިތުބާރު ހުރި ފަރުވާ ހޯދުމަށް ހުޅުވިގެންދިޔަ މުހިންމު ދޮރެކެވެ.
