ހޯރަފުށީ އެއަރޕޯރޓް ޖެޓީގެ ވޯކްވޭ ހެދުމުގެ މަސައްކަތް ފަށައިފިއެވެ. މައުލޫމާތު ލިބިފައިވާ ގޮތުގައި މި މަސައްކަތް ފެށީ މިހިނގާ މާރިޗް މަހުގެ އެއްވަނަ ދުވަހުއެވެ. އެއަރޕޯރޓް ޖެޓީ ނިމި 2 އަހަރާއި 6 މަސް ފަހުން ވޯކްވޭ މަސައްކަތް ފެށުނީ ސަރަހައްދުގެ ރައްޔިތުން އެތައް ތަކްލީފެއް އުފުލި ފަހުންނެވެ.
ޖެޓީއާއި ހަމަޔަށް ދާނެ ވޯކްވޭއެއް ނެތުމުން ޓްރޮލީ ނުދުއްވޭތީ، އެއާރޕޯޓް ޖެޓީ ބޭނުންކުރަމުންދާ ފަރާތަކަށް އަދިވެސް އެދެމެދު ހުރަސްކުރަންޖެހެނީ ލަގެޖް އަތުން އުފުއްލައިގެންނެވެ. ވިއްސާރަނަމަ ދާންޖެހެނީ ތެމިގެންނެވެ. އަދި އެސަރަހައްދުގައި ޗަކަ އޮންނާތީ އިތުރަށް އުނދަގޫވެއެވެ. އެއަރޕޯޓްގެ ޓާމިނަލާއި ޖެޓީއާއި ދެމެދު ހުންނަނީ 140 ހަކަށް މީޓަރުނަމަވެސް އެދެމެދުގައި ބަގީއެއްވެސް ދަތުރު ކޮށްދެނީ 30ރ އަށެވެ.
ހޯރަފުށި އެއަރޕޯޓްގެ މަޝްރޫޢު 2019 ވަނަ އަހަރުގެ މާރިޗް 25 ގައި މޯލްޑިވެސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާއި ޙަވާލުކުރިއެވެ. 198 މިލިއަން ރުފިޔާ ޚަރަދުކޮށް ހެދި މި އެއަރޕޯޓަކީ އިހަވަންދިއްޕޮޅުގައި އެހާތަނަށް ހިންގި އެންމެ ބޮޑު މަޝްރޫޢެވެ. މިމެގަ ޕްރޮޖެކްޓް ނިންމައި އެއަރޕޯރޓް ހުޅުވީ އެމަސައްކަތް ހަވާލުކުރިތާ، އެންމެ އަހަރަކާއި، 7 މަސް ތެރޭގައެވެ. މިއީ އެފަދަ ބޮޑު މަޝްރޫޢެއް ނިންމަން ވަރަށް ކުރު މުއްދަތެއްކަމަށް ގިނަމީހުން ބުނެއެވެ.
އެއަރޕޯޓް ރަންވޭގައި ލައިޓް ނެތުމުން ރޭގަނޑު ފުލައިޓް ނުޖެއްސޭތީ، އެއާޕޯރޓްގެ ހިދުމަތްދެމުން އައީ ހަމައެކަނި ދުވާލު ވަގުތުއެވެ. އެއަރޕޯޓް ރަންވޭގައި ލައިޓްޖެހުމަށް ސަރުކާރުން ނިންމިތާ އަހަރެއްނުވަނީސް ލައިޓް ހަރުކޮށް، ރޭގަނޑުގެ ދަތުރުތައް ފެށިއެވެ.
ނަމަވެސް އެއަރޕޯރޓްގައި ޖެޓީއެއް ނެތުމުން ޕަސެންޖަރުން ކުރަމުންދިޔަ ޝަކުވާތަކަށް، އެއަރޕޯރޓާއި ގުޅުންހުރި އެހެން މަޝްރޫޢުތައް ކުރިޔަށްދިޔަ ސްޕީޑްގައި ހައްލެއް ނުލިބުނެވެ. އެއަރޕޯޓް ހުޅުވުމުގެވެސް މާކުރިން، އެއާޕޯޓްގައި، ލަފާފުރުމަށް ވަކި ޖެޓީއެއް ނަހަދާތީ އެކަމުގައި ހުރި ކަންބޮޑުވުންތަކާއެކު ތުރާކުނާއި ހޯރަފުށި ނޫން، ހއ އަތޮޅުގެ ހުރިހާ ރަށެއްގެ ކައުންސިލްތަކުން ރައީސުލްޖުމްހޫރިއްޔާގެ އޮފީހަށް ސިޓީ ފޮނުވައި ސަމާލުކަމަށް ގެނައެވެ. އެއީ 2020 ވަނަ އަހަރުގެ އޮކްޓޯބަރ މަހުއެވެ. ނަމަވެސް ޖެޓީއެއްގެ މަސައްކަތް ފެށޭވަރުވީ އޭގެ 706 ދުވަސް ފަހުން 2022 ވަނަ އަހަރުގެ ސެޕްޓެމްބަރ މަހުގެ 7 ވަނަ ދުވަހުއެވެ.
ޖެޓީ ހެދުމުގެ މަސައްކަތް 2021 ވަނަ އަހަރުގެ އޮގަސްޓް މަހުގެ 5 ވަނަ ދުވަހު، 150 ދުވަހުގެތެރޭގައި ނިންމާގޮތަށް 5.9 މިލިއަން ރުފިޔާގެ އަގަކަށް އެމްޓީސީސީއާ ހަވާލުކުރިއެވެ. ނަމަވެސް އެމަސައްކަތް އެކުންފުނިން ފެށީވެސް އެމަސައްކަތް ހަވާލުކުރިތާ 341 ދުވަސް ފަހުންނެވެ. ޖެޓީގެ މަސައްކަތް ނިމި ބޭނުންކުރަން ފެށުނީ 2023 ވަނަ އަހަރުގެ ސެޕްޓެމްބަރ މަހުއެވެ. 5.9 މިލިއަން ރުފިޔާގެ ޖެޓީއެއް ނިންމަން އެމްޓީސީސީ އަށް 2 އަހަރާއި 1 މަސް ބޭނުންވިއެވެ.
ގިނަބަޔަކު ޤަބޫލުކުރާ ގޮތުގައި ރައީސް ސޯލިހްގެ ވެރިކަން ނިމިނިމިއޮއްވާވެސް އެއަރޕޯޓް ޖެޓީ ބޭނުންކުރަން ފެށޭވަރުވީ، އޭރުގެ އިހަވަންދޫ ދާއިރާގެ މެމްބަރު މުހައްމަދު ޝިފާއު ގޮތްދޫނުކޮށް ކުރެއްވި ބުރަ މަސައްކަތުންނެވެ. އެބޭފުޅާ އެއަރޕޯޓް ކުންފުންނާ އެމްޓީސީސީއިން ދެއިރު ދެދަޅައަށް ޖެޓީގެ ޕްރޮގުރެސް ސާފުކުރެއްވިއިރު، މަސައްކަތް ކުރިޔަށް ނުދާކަމުގެ ޝަކުވާ ހިއްޕަވައިގެން ރައީސް އަދި ރައީސް އޮފީހުގެ މިނިސްޓަރުންގެ ބޮލުގައި ކޮއްޓެވީ މަދެއްކޮށެއްނޫނެވެ.
އޭރުގެ ހައުސިން މިނިސްޓަރު އަސްލަމް މަޖިލީހަށް އެއްވެސް ކަމެއްގައި ހާޒިރު ވެއްޖެނަމަ، އެބޭފުޅާގެ ބޮލުގަ ރިހުމަކަށް ވެފައިއޮންނަނީ މެމްބަރު ޝިފާއު އެއާޕޯރޓް ޖެޓީގެ މައްސަލާގައި ތަކުރާރުކޮށް އަމާޒުކުރައްވާ ސުވާލުތަކެވެ. އެވަރަކުންވެސް ދުލެއް ނުކުރެއްވިއެވެ. ސިޔާސީ އެތައް ޕްރެޝަރެއް ކުރިމަތިވިނިމަވެސް އެއާރޕޯޓް ޖެޓީގެ މައްސަލާގައި، އޭރުގެ، މިނިސްޓަރ އޮފް ޓްރާންސްޕޯޓް އެންޑް ސިވިލްއޭވިއޭޝަން ޢާއިޝަތު ނަހުލާ މަޖިލީހަށް ހާޒިރުކޮށް އެކަމާ ގުޅޭގޮތުން ސުވާލުކުރެއްވިއެވެ.
އިހަވަންދޫ ދާއިރާގެ މިހާރުގެ މެމްބަރު އަހްމަދު ނަސީރު ވިދާޅުވީ، އެއަރޕޯރޓް ޖެޓީގެ ވޯކްވޭގެ ކަންބޮޑުވުމާއިއެކު އެމަސައްކަތް އަވަސް ކުރުމަށް ރީޖަންލް އެއަރޕޯޓުގައި ދަންނަވައި 12 ފަހަރު އޮފީހަށް ދުރުވެ އެމްޑީއާ ބައްދަލުކުރެއްވިކަމަށެވެ. އަދި އެކުންފުނިން އެކަމަށް ހަރަދުކުރަން ނެޖެހޭގޮތަށް، އާރުޑީސީގެ ސީއެސްއާރުގެ ދަށުން އެމަސައްކަތް ކުރެވޭނެ މަގު ދެއްކެވިކަމަށް ނަސީރު ވިދާޅުވިއެވެ. ނަސީރު ވިދާޅުވީ، ސަރުކާރު ޕޮލިސީ އަށް ބަދަލުގެނެސް އެމް އޭ ސީއެލް އާއި ހުރިހާ އެއާޕޯޓް ހިންގުން ހަވާލުކުރުމާ ގުޅިގެން ހޯރަފުށީ އެޢާޕޯޓުން މިހާރަށްވުރެ ފުރިހަމަޔައް ހިދުމަތްދިނުމާއި އަދި ގެންނަ ބަދަލުތަކައިއެކު ވޯކްވޭގެ މަސައްކަތް ކޮށްދެއްވުމަށް، 10 ވަރަކަށް ފަހަރު އެމް.އޭ.ސީ.އެލް ގެ އެމްޑީ އަރިހުގައި ދެންނެވި ކަމަށެވެ.
