އިހަވަންދޫ ތިލައުތުރު ވޮލީ މުބާރާތުގެ ސެމީ ފައިނަލަށް ދަތުރުކޮށްފި

ހއ. މުރައިދޫގައި ކުރިއަށްދާ "ތިލައުތުރު ވޮލީ މުބާރާތް - 2024" ގައި އިހަވަންދޫ ޓީމް   ދިއްދޫ ބަލިކޮށް ސެމީ ފައިނަލަށް ދަތުރުކޮށްފިއެވެ.  މި މުބާރާތަކީ ހއ. އަތޮޅު ކައުންސިލާއި ހއ. މުރައިދޫ ކައުންސިލް ގުޅިގެން ބާއްވާ މުބާރާތެކެވެ. އިއްޔެ ކުޅުނު މެޗުގައި އިހަވަންދޫ ޓީމުން ވަނީ ދިއްދޫ 3 ސެޓުން ބަލިކޮށްފައެވެ. މި މެޗުން އިހަވަންދޫ މޮޅުވީ 25-7، 25-15 އަދި 25-20 އިންނެވެ. މެޗުގެ އެންމެ މޮޅު ކުޅުންތެރިޔާއަށް  ހޮވުނީ އިހަވަންދޫ ޓީމުގެ ޖާޒީ ނަންބަރު 9، އީނަތު އަހްލާއެވެ. އިހަވަންދޫ ޓީމުން ވަނީ މި މުބާރާތުގައި ކުޅުނު ދެ މެޗުންވެސް މޮޅުވެފައެވެ. ފުރަތަމަ މެޗުގައި އިހަވަންދޫ ވަނީ ބާރަށް 25-7، 25-8 އަދި 25-8 އިން ބަލިކޮށްފައެވެ. މި މުބާރާތް ފެށުނީ މި މަހުގެ 15 ވަނަ ދުވަހުއެވެ. އަދި ނިމޭނީ 23 ވަނަ ދުވަހުއެވެ. މުބާރާތުގައި ބައިވެރިވެފައިވަނީ 7 ޓީމެވެ. އެއީ މުރައިދޫ، އުތީމް، ކެލާ، ވަށަފަރު، އިހަވަންދޫ، ބާރަށް އަދި ދިއްދޫއެވެ. މުބާރާތް ކުރިއަށްދަނީ ދެ ގްރޫޕަކަށް ބަހާލައިގެންނެވެ. މުބާރާތުގެ ޗެމްޕިއަން ޓީމަށް 20،000 ރުފިޔާ، ރަނަރަޕް ޓީމަށް 10،000 ރުފިޔާ އަދި ފެއަރ ޕްލޭ ޓީމަށް 5،000 ރުފިޔާގެ ފައިސާގެ އިނާމު ދިނުމަށް ވަނީ ހަމަޖެހިފައެވެ.