ވެނެޒުއޭލާގެ ތެލުން އެމެރިކާއަށް ފައިދާ ހޯދިދާނެބާ؟

ވެނެޒުއެލާގެ ރައީސް ނިކޮލަސް މަޑޫރޯ އާއި އޭނާގެ އަނބިކަނބަލުން ސިއްސުވާލާފަދަ ގޮތަކަށް ކިޑްނެޕްކޮށް ، އެމެރިކާގެ ރައީސް ޑޮނަލްޑް ޓްރަމްޕް ވަނީ އެ ގައުމާ މެދު ގެންގުޅުއްވާ މަކަރުވެރި ސިޔާސަތު  އާންމުކުރައްވާފައެވެ. ނޫސްވެރިންނާ ވާހަކަ ދައްކަވަމުން ޓްރަމްޕް ވަނީ ވެނެޒުއެލާގެ ތެލުގެ ސިނާއަތަށް އެމެރިކާއިން  އަތްގަދަ ކުރުމުގެ ތަސައްވުރެއް ހާމަކުރައްވާފައެވެ. ޓްރަމްޕް ފާހަގަކުރެއްވި ގޮތުގައި،  އެމެރިކާގެ ތެޔޮ ކުންފުނިތައް ވެނެޒުއެލާއަށް ފޮނުވައި، ބިލިއަން ޑޮލަރުގެ އިންވެސްޓްމަންޓްތަކެއް ކުރުމަށް އޭނާ ބޭނުންފުޅުވެއެވެ. މިކަމުގެ ބޭނުމަކީ ވެނެޒުއެލާގައި ވަރަށް ބޮޑަށް ހަލާކުވެފައިވާ ތެލުގެ އިންފްރާސްޓްރަކްޗާ މަރާމާތުކޮށް، އެމެރިކާގެ ތެލާއި ގޭހުގެ ސިނާއަތަށް ބޮޑު ކުރިއެރުމެއް ހޯދައިދިނުމެވެ. ޓްރަމްޕްގެ މި ފިޔަވަޅަކީ ސްޓްރެޓެޖިކް އަދި އިގްތިސާދީ ގޮތުން ލިބޭނެ ބޮޑު ފުރުސަތެއްގެ ގޮތުގައި  އޭނާ ސިފަކުރައްވައެވެ. ނަމަވެސް، ޓްރަމްޕްގެ މި އުންމީދުތަކާ މެދު ތަޖުރިބާކާރުން ދަނީ ސުވާލު އުފައްދައި އިންޒާރު ދެމުންނެވެ. ވެނެޒުއެލާގެ ތެލުގެ އުފެއްދުންތެރިކަން ވަނީ ފާއިތުވި އަހަރުތަކުގައި ބޮޑުތަނުން ދަށަށް ގޮސްފައެވެ. އެއް ޒަމާނެއްގައި ދުވާލަކު 3 މިލިއަނަށް ވުރެ ގިނަ ފީފާ ތެޔޮ އުފެއްދި ނަމަވެސް، 2018 ވަނަ އަހަރާ ހަމައަށް އައިއިރު އެ އަދަދު ވަނީ 1.3 މިލިއަން ފީފާއަށް ވެއްޓިފައެވެ. އޮއިލް ޗޭންޖް އިންޓަނޭޝަނަލްގެ އެނަލިސްޓެއް ކަމަށްވާ ލޯން ސްޓޮކްމަން ވިދާޅުވި ގޮތުގައި، ޓްރަމްޕްގެ ވެރިކަމުގެ ތަސައްވުރާއި، ތެލުގެ ބާޒާރުގައި ހަގީގަތުގައި ހިނގަމުންދާ ކަންކަމާ ދެމެދު ބޮޑު ފަރަގެއް އެބައޮތެވެ. އަދި އެމެރިކާގެ ކުންފުނިތަކުން ހަގީގަތުގައި ބޭނުންވާ ކަންކަމާ ޓްރަމްޕްގެ ވިސްނުން ދިމާނުވާކަން އޭނާ ފާހަގަކުރެއްވިއެވެ. ފަންނީ ގޮންޖެހުންތަކުގެ އިތުރުން، މިކަމުގައި އިގްތިސާދީ އަދި ޖިއޮޕޮލިޓިކަލް ގޮތުން ބޮޑެތި ހުރަސްތަކެއް ހުރިކަން ތަޖުރިބާކާރުން ފާހަގަކުރެއެވެ. ވެނެޒުއެލާގެ މިހާލަތުގެ ސަބަބުން ބައިނަލްއަގުވާމީ މައިދާނުގައި އެމެރިކާގެ އިތުބާރާ މެދު ގިނަ ބަޔަކު ދަނީ ސުވާލު އުފައްދަމުންނެވެ. އެ ގައުމުގެ ދާޚިލީ ކަންކަމުގެ ތެރެއަށް އެމެރިކާގެ ކުންފުނިތައް ވެއްދުމުގެ މި ނިންމުމަކީ ސަރަހައްދީ ހަމަޖެހުމަށް ވެސް ނުރައްކާވެދާނެ ކަމެއް ކަމަށް ބައެއް ފަރާތްތަކުން ދެކެއެވެ. އަދި  ޖިއޮޕޮލިޓިކްސް އެއީ ގާތްގަނޑަކަށް ރާޒުވާ ކުޅިގަނޑެއް ފަދައިން ބަލާ ޓްރަމްޕްގެ އުސޫލުގެ ސަބަބުން ދުނިޔޭގެ މައިދާނުގައި އެމެރިކާގެ ދަރަޖަ ގެއްލިދާނެ ކަމަށް ވެސް ފާޑުކިޔުންތެރިން އިންޒާރު ދެ އެވެ. ހަކަތައިގެ ސިޔާސަތުތަކުގައި ޓްރަމްޕް ގެންގުޅުއްވާ ހަރުކަށި އުސޫލުތަކުގެ ސަބަބުން ބައިނަލްއަގުވާމީ މައިދާނުގައި އެމެރިކާއަށް އޮތް އިތުބާރު ގެއްލިދާނެ ކަމުގެ ބިރު އެބައޮތެވެ. ވަކިން ހާއްސަކޮށް، ސްޓްރެޓެޖިކް ފައިދާއަށްޓަކައި ބޭރުގެ ލީޑަރުންނަށް ނުފޫޒު ފޯރުވުމާއި ބައިނަލްއަގުވާމީ އުސޫލުތަކާ ހިލާފު އަމަލުތަކުގެ ސަބަބުން ފާޑުކިޔުންތައް ވަނީ އަމާޒުވެފައެވެ. މީގެ އިތުރުން، ވެނެޒުއެލާގެ ތެލުގެ ރިޒާވް ކުއްލިއަކަށް ބާޒާރަށް ނެރެފިނަމަ، ދުނިޔޭގެ ތެލުގެ ބާޒާރަށް ބޮޑު ލޮޅުމެއް އަތުވެދާނެ ކަމަށް ތަހުލީލުކުރާ ފަރާތްތަކުން އިންޒާރުދެއެވެ. ޓްރަމްޕްގެ މި އެޖެންޑާގެ ސަބަބުން ދުނިޔޭގެ އިގްތިސާދީ އަދި ސިޔާސީ މަސްރަހަށް އަތުވެދާނެ ބަދަލުތަކަށް ގިނަ ބަޔަކު ދަނީ ފާރަވެރިވަމުންނެވެ. ޓްރަމްޕް އޭނާގެ އެޖެންޑާ ކުރިއަށް ގެންދަވާއިރު، ދުނިޔެ ދަނީ ވަރަށް ގާތުން ބަލަމުންނެވެ. ވެނެޒުއެލާގެ ތެލަކީ ސްޓްރެޓެޖިކް އިނާމެއްގެ ގޮތުގައި ރައީސް ދެކެވަޑައިގަންނަވާއިރު، ދުނިޔޭގެ ސިޔާސީ މައިދާނުގައި އެމެރިކާގެ ދައުރާ މެދު މިހާރުވެސް ބަހުސްތައް ވަނީ އުފެދިފައެވެ.