ތިލައުތުރު ފުޓްސަލް މުބާރާތް 2024 ގައި، އިހަވަންދޫ ޓީމް ކުޅުނު ފުރަތަމަ މެޗްގައި ފަހަތުން އަރައި އުތީމް ބަލިކޮށްފިއެވެ. މިމެޗުން އިހަވަންދޫ ޓީމް މޮޅުވީ 1-3 ގެ ނަތީޖާއަކުންނެވެ.
މިމެޗް ފުށުމާއިއެކު ފުރަތަމަ މިނެޓްގައި އުތީމް ޓީމްގެ ޖާޒީނަންބަރު 7 މަޒީންވަނީ އެޓީމަށް ގޯލެއް ޖަހައި ލީޑް ނަގައިދީފައެވެ. އިހަވަންދޫ ޓީމަށް ނަތީޖާ ހަމަހަމަ ކޮށްދިނީ ޖާޒީ ނަންބަރު 7 މަދީހްއެވެ. އިހަވަންދޫ ޓީމަށް ފުރަތަމަ ފަހަރަށް ހާމިދު ލީޑް ނަގައިދިންއިރު، އިހަވަންދޫ ޓީމްގެ ލީޑްފުޅާ ކޮށްދިނީ ޝާނިއުއެވެ. މިމެޗްގެ މޮޅު ކުޅުންތެރިޔާއަށް ހޮވުނީ އިހަވަންދޫ ޓީމްގެ ކެޕްޓަން، މަދީހްއެވެ.
ދެން މިމުބާރާތުގައި އިހަވަންދޫ ޓީމް ނުކުންނާނީ އުލިގަމާ ދެކޮޅަށެވެ. އެމެޗް ކުޅޭނީ މިމަހުގެ 6 ވަނަ ދުވަހުގެ ހަވީރު 17:00 ގައެވެ. މިމުބާރާތުގައި އިހަވަންދޫ ހިމެނެނީ ގްރޫޕް 2 ގައެވެ. އެ ގުރޫޕްގައި ހިމެނެނީ ތުރާކުނު، އުތީމް، އުލިގަން، ކެލާ އަދި އިހަވަންދޫއެވެ.
ޖުމުލަ 10 ޓީމެއް ބައިވެރިވެފައިވާ މިމުބާރާތް ކުރިޔަށްދާނީ މިމަހުގެ 11 އާއި ހަމަޔަށެވެ. މިމުބާރާތް ކުރިޔަށްދަނީ ޓީމްތައް ދެ ގްރޫޕަކަށް ބަހާލައިގެން ކޮންމެ ގްރޫޕެއްގައި ހިމެނޭ ޓީމް ތަކުގެ މެދުގައި ޕޮއިންޓް އުސޫލުން މެޗްތައްކުޅެ ކޮންމެ ގްރޫޕަކުން އެއްވަނަ އަދި ދެވަނަ ޓީމް ސެމީ ފައިނަލަށް ދަތުރުކުރާ ގޮތަށެވެ.
މިމުބާރާތަކީ ތިލައުތުރު ފުޓްސަލް މުބާރާތުގެ 3 ވަނަ މުބާރާތެވެ. މިދިޔަ އަހަރު ކުޅުނު މިމުބާރާތުގެ ދެވަނަ މުބާރާތުގެ ޗެމްޕިއަންކަން ހޯދީ ވަށަފަރު ޓީމެވެ. މި މުބާރާތުގެ ޗެމްޕިއަން ޓީމަށް 30000 (ތިރީސްހާސް) ރުފިޔާ، ރަނަރަޕް ޓީމަށް 15000 (ފަނަރަހާސް) ރުފިޔާ އަދި ފެއާޕްލޭ ޓީމަށް 10000 (ދިހަހާސް) ރުފިޔާގެ ފައިސާގެ އިނާމުވަނީ ހުށަހަޅާފައެވެ.
