ހއ. އަތޮޅު ކައުންސިލުން އިންތިޒާމުކޮށްގެން، ހއ. ކެލާގައި މިހާރު ކުރިއަށްދާ 3 ވަނަ ތިލައުތުރު ފުޓްސަލް މުބާރާތުގެ ފައިނަލަށް އިހަވަންދޫ ދަތުރު ކޮށްފިއެވެ. މިމުބާރާތުގެ ފައިނަލަށް އިހަވަންދޫ ދަތުރުކުރީ މިރޭ ކުޅުނު ސެމީ ފައިނަލް މެޗް ދިއްދޫއާ ވާދަކޮށް 5-2 ގެ ނަތީޖާއަކުން ކާމިޔާބު ކޮށްގެންނެވެ. މިއީ މިމުބާރާތުގެ ފައިނަލަށް އިހަވަންދޫ ދަތުރުކުރި ފުރަތަމަ ފަހަރެވެ.
މެޗްގެ ފުރިހަމަ ވަގުތު ހަމަވިއިރު 1-1 ގެ ނަތީޖާއަކުން ދެ ޓީމް ހަމަހަމަވުމުން މިރޭގެ މެޗްގެ ނަތީޖާ ނެރުނީ ޕެނަލްޓީ ޖަހައިގެންނެވެ. މިމެޗްގެ މޮޅު ކުޅުންތެރިޔާއަށް ހޮވުނީ، މިރޭގެ މެޗްގައި ގިނަ ސޭވްތަކެއްކޮށް މޮޅު ކުޅުމެއްދެއްކި އިހަވަންދޫ ޓީމްގެ ގޯލް ކީޕަރު ރިޝްފާންއެވެ. ރީޝްފާންވަނީ ޕެނަލްޓީ ސޫޓް އައުޓްގައި ޕެނަލްޓީއެއްވެސް ދިފާއުކޮށްފައެވެ.
މިމުބާރާތުގެ ފައިނަލްގައި އިހަވަންދޫއާ ދެކޮޅަށް ނުކުންނާނީ އުތީމްއެވެ. އެޓީމް ފައިނަލަށް ދަތުރުކުރީ ސެމީ ފައިނަލްގައި ބާރަށުގެ މައްޗަށް 4-1 ގެ ނަތީޖާއަކުން ކުރި ހޯދައިގެންނެވެ. އުތީމް އަކީ މިދިޔަ އަހަރުއޮތް، ތިލައުތުރު ފުޓްސަލް މުބާރާތް 2023 ގެ ދެވަނަ ޓީމެވެ. މިމުބާރާތުގެ ފައިނަލް މެޗް ކުޅޭނީ މިމަހުގެ 11 ވަނަ ދުވަހުގެ ހަވީރު 16:00 ގައެވެ.
