މި އަހަރު ހއ. އިހަވަންދޫގައި ގިނަ ކުޅިވަރު މުބާރާތްތަކެއް ބާއްވާނެ ކަމަށް އިހަވަންދޫ ކައުންސިލް އަދި ރަށުގެ ބައެއް އެންޖީއޯތަކުން ހާމަކޮށްފިއެވެ. . މިހާތަނަށް ބާއްވާނެ ކަމަށް އިއުލާންކޮށްފައިވާ މުބާރާތްތަކުގެ ތެރޭގައި ހިމެނެނީ ތިން ފުޓްސަލް / ފުޓްބޯޅަ މުބާރާތާއި، ވޮލީބޯޅަ މުބާރާތެކެވެ.
1. އިހަވަން ފުޓްސަލް ޗެލެންޖް
މިއީ ސީޕީއެސް ސްޕޯރޓްސް އެންޑް ރެކްރިއޭޝަން ކްލަބް “ސާކް” އިން އިންތިޒާމްކޮށްގެން ބާއްވާ މުބާރާތެކެވެ. މިއަހަރަކީ މި މުބާރާތް ބާއްވާ ތިންވަނަ އަހަރެވެ. މިހިނގާ ޖުލައި މަހުގެ 25 ވަނަ ދުވަހު ފެށުމަށް ހަމަޖެހިފައިވާ މި މުބާރާތުގެ ޗެމްޕިއަން ޓީމަށް 30,000 ރުފިޔާގެ ފައިސާގެ އިނާމެއް ހުށަހަޅާފައިވާއިރު، ރަނަރަޕް ޓީމަށް 7,000 ރުފިޔާ ދިނުމަށް ވަނީ ހަމަޖެހިފައެވެ.
2. ކައުންސިލް ކަޕް ފިރިހެނުންގެ ވޮލީ މުބާރާތް
އިހަވަންދޫ ކައުންސިލުން އިންތިޒާމްކޮށްގެން ބާއްވާ މި ވޮލީބޯޅަ މުބާރާތް ފެށުމަށް ހަމަޖެހިފައިވަނީ އޯގަސްޓް މަހުގެ 15 ވަނަ ދުވަހުއެވެ. މި މުބާރާތުގެ ޗެމްޕިއަން ޓީމަށް 30,000 ރުފިޔާ އަދި ރަނަރަޕް ޓީމަށް 10,000 ރުފިޔާގެ ފައިސާގެ އިނާމެއް ވަނީ ކަނޑައަޅާފައެވެ.
3. ކައުންސިލް ކަޕް ފުޓްބޯޅަ މުބާރާތް
މި އަހަރުގެ އޮކްޓޯބަރު މަހު އިހަވަންދޫ ކައުންސިލުން ބާއްވާ މި ފުޓްބޯޅަ މުބާރާތަކީ ބޮޑު އިނާމުތަކެއް ހުށަހަޅާފައިވާ މުބާރާތެކެވެ. މުބާރާތުގެ ޗެމްޕިއަން ޓީމަށް 50,000 ރުފިޔާ، އަދި ރަނަރަޕް ޓީމަށް 15,000 ރުފިޔާގެ ފައިސާގެ އިނާމެއް ވަނީ ހުށަހަޅާފައެވެ.
4. އިމަގު ޣާޒީ ކަޕް 2025 – 19 އަހަރުން ދަށުގެ ފުޓްސަލް މުބާރާތް
މި މުބާރާތަކީ އިހަވަންދޫ މަސްވެރިންގެ ގުޅުން، “އިމަގު” އިން އިންތިޒާމްކޮށްގެން ބާއްވާ 19 އަހަރުން ދަށުގެ ފުޓްސަލް މުބާރާތެކެވެ. މިއީ ހއ. އަތޮޅުގެ މަތި ބިތުގެ ރަށްތައް ކަމަށްވާ އިހަވަންދޫ، ތުރާކުނު، އުލިގަން، މޮޅަދޫ، ހޯރަފުށި، މާރަންދޫ، އަދި ތަކަންދޫއަށް ހުޅުވާލެވިފައިވާ މުބާރާތެކެވެ. މި މުބާރާތް އޮންނާނީ ސެޕްޓެމްބަރު މަހުގެ 19 ވަނަ ދުވަހުއެވެ.
މި މުބާރާތްތަކުގެ އިތުރުން، މިއަހަރުގެ ނޮވެމްބަރު މަހު ބާއްވާ “ތިލަ އުތުރު ފުޓްސަލް ޗެލެންޖް” ގައި އިހަވަންދޫ ބައިވެރިވާނެ ކަމަށްވެސް ބެލެވެއެވެ. އިހަވަންދޫއަކީ މިދިޔަ އަހަރުގެ މުބާރާތުގެ ޗެމްޕިއަންޓީމެވެ.ތިލަ އުތުރު ފުޓްސަލް ޗެލެންޖް 2025 ބޭއްވުމަށް ހަމަޖެހިފައިވަނީ ހއ އުތީމުގައެވެ. އިހަވަންދޫގައި ބާއްވާ އެންމެ އަގުބޮޑު މުބާރާތް ކަމަށްވާ މައިކަޕް ފުޓްބޯޅަ މުބާރާތް މިއަހަރު ބާއްވާނެކަމަކަށް އަދި އިއުލާނެއް ނުކުރެއެވެ.
މިހުރިހާ މުބާރާތްތަކަކީވެސް އިހަވަންދޫގެ ރައްޔިތުންނަށް، ޚާއްސަކޮށް ޒުވާނުންނަށް ކުޅިވަރުގެ ތެރެއިން ގުޅުން ބަދަހިކޮށް، ހުނަރުތައް ދައްކާލުމުގެ ރަނގަޅު ފުރުސަތުތަކެއް ލިބިގެންދާނެ ކަމެއް ކަމަށް ބެލެވެއެވެ. ނަމަވެސް މުބާރާތްތަކުގައި ބައިވެރިވާ ޓީމްތަކުގެ މާލީ ހާލަތު ރަނގަޅު ނޫންކަމަށް މައުލޫމާތު ލިބެއެވެ.
