އިހަވަންދޫގެ އުތުރުފަރާތުގައި، ކަރުގޮހޮރާއި އަދި ގޭގޭގައި އުފެދޭ ކުނިވާޒާތުގެ ތަކެތި ރައްކާތެރިކަމާއެކު އުކާލުމަށް ޚާއްސަ ފާލަމެއް އެޅުމަށް އިހަވަންދޫ ކައުންސިލުން ތައްޔާރުވެއްޖެއެވެ. މި މަޝްރޫޢުގެ ދަށުން، ފާލަން އެޅުމަށް ބޭނުންވާ ކުރެހުންތަކާއި ބިލް އޮފް ކޮންޓިޓީސް (ބީ.އޯ.ކިއު) ތައްޔާރުކޮށްދޭނެ ފަރާތެއް ހޯދުމަށް އިހަވަންދޫ ކައުންސިލުން ވަނީ މިއަދު އިޢުލާނުކޮށްފައެވެ.
މި މަޝްރޫޢަކީ ރަށުގެ ސާފުތާހިރުކަން ދެމެހެއްޓުމަށާއި، ކަނޑަށް ކުނި އެޅުން ހުއްޓުވައި، ދިރިއުޅޭ މާހައުލަށް ދިމާވާ ދަތިތައް ހައްލުކުރުމަށް މުހިންމު މަސައްކަތެކެވެ. ކަރުގޮހޮރާއި ގޭގޭގައި އުފެދޭ ކުނިވާޒާތުގެ ތަކެތި ރަނގަޅު އުސޫލުތަކެއްގެ ދަށުން ނައްތާލުމަށް މިފަދަ ފާލަމެއް އަޅާނެކަމަށް، އިހަވަންދޫ ކައުންސިލުން އެންމެފަހުން ބޭއްވި ރައްޔިތު ބައްދަލުވުމުގައި އިއުލާނުކޮށްފައިވެއެވެ.
އިހަވަންދޫ ކައުންސިލުންހޯދަނީ މި ފާލަން އެޅުމަށް ބޭނުންވާ ކޮންސެޕްޓާއި، އާކިޓެކްޓުރަލް، އިންޖީނިއަރިންގ ޑްރޯވިންތަކާއި އަދި މި މަސްރޫޢުގެ ބީ.އޯ.ކިއު ތައްޔާރުކޮށްދޭނެ ފަރާތެކެވެ. ބީލަމުގައި ރަޖިސްޓްރީ ވުމަށް މެއިލް ކުރައްވާނީ procurement@ihavandhoo.gov.mv އަށެވެ. ފޯނުން ރަޖިސްޓްރީވުމަށް ގުޅުއްވާނީ 6500285 ނަންބަރު ފޯނަށެވެ.
