ސެންސިޓީ އަތުން ބަދަލު ހިފައި ބޮޑުމަގު ފައިނަލަށް

ސެންސިޓީ ބަލިކޮށް ޑަބުލިއު.ޑީ.ސީ އަންހެން ވޮލީ ބޯޅަ މުބާރާތް 2024، ގެ ފައިނަލަށް އެފްސީ ބޮޑުމަގު ދަތުރުކޮށްފިއެވެ. މިމުބާރާތުގެ ފައިނަލަށް ބޮޑުމަގު ދަތުރުކުރީ މިރޭކުޅުނު ސެމީފައިނަލް  މެޗްގައި  ސެންސިޓީގެ މައްޗަށް 3-1 ސެޓުން ކުރި ހޯދައިގެންނެވެ. މިމުބާރާތުގެ ގްރޫޕް ސްޓޭޖްގައި މިދެ ޓީމް ބައްދަލުކުރި މެޗް ސެންސިޓީ ކާމިޔާބުކުރީ 1-3 ސެޓުންނެވެ. ވާދަވެރި ފޯރިގަދަ ކުޅުމެއް ފެނުނު ރޭގެ މެޗްގެ މޮޅު ކުޅުންތެރިޔާއަށް ހޮވުނީ ބޮޑުމަގު ޓީމްގެ ސަހުމީލާ ހަކީމްއެވެ. މިމަހުގެ 25 ވާ ހުކުރު ދުވަހުގެ ރޭ ކުޅޭ މިމުބާރާތުގެ ފައިނަލް މެޗްގައި ވާދަކުރާނީ ބޮޑުމަގު އަދި ކުޑަކަތީބު މަގެވެ. ކުޑަކަތީބު މަގު މިމުބާރާތުގެ ފައިނަލަށް ދަތުރުކުރީ، ގްރޫޕް ސްޓޭޖުގައި ކުޅިމަގު ކުޅުނު ހުރިހާމެޗަކުން މޮޅުވެ 9 ޕޮއިންޓް ހޯދައިގެން 1 ވަނަ ޓީމްގެ ގޮތުގައެވެ. މިމުބާރާތުގެ ގްރޫޕް ސްޓޭޖް ލީގު އުސޫލުން ކުޅުނުއިރު، އެންމެ ގިނައިން ޕޮއިން ހޯދި ޓީމަށް ފައިނަލުން ސީދާ ޖާގައެއް ކަށަވަރުވެއެވެ. މިމަހުގެ 20 އިން 25 އަށް  ކުރިޔަށްދާ މ މިމުބާރާތުގައި ވާދަކުރަނީ ހަތަރު ޓީމެކެވެ. އެއީ އެފްސީ ބޮޑުމަގު، ސެންސިޓީ، ކުޑަކަތީބު މަގު އަދި ހޯރަފުށީ ޑަބުލިއު.ޑީ.ސީއެވެ. މިމުބާރާތުގެ  ޗެމްޕިއަން ޓީމަށް 15000ރ ގެ ފައިސާގެ އިނާމެއް ހުށަހަޅާފައިވާއިރު، ދެވަނަ ޓީމަށް 5000ރ ގެ ފައިސާގެ އިނާމެއް ހުށަހަޅާފައިވެއެވެ.