ބޮޑު ފަރަގަކުން އުލިގަމު ބަލިކޮށް އިހަވަންދޫ އިތުބާރު ބޮޑުކޮށްފި

ތިލައުތުރު ފުޓްސަލް މުބާރާތް 2024 ގައި، އިހަވަންދޫ ޓީމް ކުޅުނު ދެވަނަ މެޗްގައި ބޮޑު ތަފާތަކުން އުލިގަމު ބަލިކޮށްފިއެވެ. މިމެޗުން އިހަވަންދޫ މޮޅުވީ 6-1 ގެ ނަތީޖާއަކުންނެވެ. ކެލޭ ފުޓްސަލް ދަނޑުގައި ކުޅުނު މިމެޗްގެ މޮޅު ކުޅުންތެރިޔާއަށް ހޮވުނީ، އިހަވަންދޫ ޓީމްގެ ޖާޒީ ނަންބަރު 21، އިބްރާހިމް ޝިފާޒްއެވެ. މިމެޗްގައި އިހަވަންދޫ ޓީމްގެ ސާޖިދު އަދި ޝިފާޒް ކޮންމެ ކުޅުންތެރިޔަކު 2 ގޯލް ޖެހިއިރު، ހާމިދު އަދި މަދީހްވެސް ގޯލެއް ޖެހިއެވެ. މިމުބާރާތުގައި އިހަވަންދޫ ކުޅޭ 3 ވަނަ މެޗްގައި ނުކުންނާނީ ތުރާކުނާ ދެކޮޅަށެވެ. އެ މެޗް ކުޅޭނީ މާދަމާ ރޭ 20:00 ގައެވެ. އިހަވަންދޫ ގްރޫޕް ސްޓޭޖްގެ ފަހު މެޗްގައި ނުކުންނާނީ މުބާރާތް ބާއްވާ ކެލަޔާ ދެކޮޅަށެވެ. އެމެޗް ކުޅޭނީ މިމަހުގެ 8 ވަނަ ދުވަހުގެ ރޭ 21:00 ގައެވެ. އިހަވަންދޫ ޓީމަށް ބާކީ 2 މެޗް އޮތްއިރު، 1 މެޗުން މޮޅުވެގެން ސެމީފައިނަލް ކަށަވަރުވާނެއެވެ. މިމުބާރާތުގައި އިހަވަންދޫ ހިމެނެނީ ގްރޫޕް 2 ގައެވެ. އެ ގުރޫޕްގައި ހިމެނެނީ ތުރާކުނު، އުތީމް، އުލިގަން، ކެލާ އަދި އިހަވަންދޫއެވެ. ޖުމުލަ 10 ޓީމެއް ބައިވެރިވެފައިވާ މިމުބާރާތް ކުރިޔަށްދާނީ މިމަހުގެ 11 އާއި ހަމަޔަށެވެ. މިމުބާރާތް ކުރިޔަށްދަނީ ޓީމްތައް ދެ ގްރޫޕަކަށް ބަހާލައިގެން ކޮންމެ ގްރޫޕެއްގައި ހިމެނޭ ޓީމް ތަކުގެ މެދުގައި ޕޮއިންޓް އުސޫލުން މެޗްތައްކުޅެ ކޮންމެ ގްރޫޕަކުން  އެއްވަނަ އަދި ދެވަނަ ޓީމް ސެމީ ފައިނަލަށް ދަތުރުކުރާ ގޮތަށެވެ. މިމުބާރާތަކީ ތިލައުތުރު ފުޓްސަލް މުބާރާތުގެ 3 ވަނަ މުބާރާތެވެ. މިދިޔަ އަހަރު ކުޅުނު މިމުބާރާތުގެ ދެވަނަ މުބާރާތުގެ ޗެމްޕިއަންކަން ހޯދީ ވަށަފަރު ޓީމެވެ. މި މުބާރާތުގެ ޗެމްޕިއަން ޓީމަށް 30000 (ތިރީސްހާސް) ރުފިޔާ، ރަނަރަޕް ޓީމަށް 15000 (ފަނަރަހާސް) ރުފިޔާ އަދި ފެއާޕްލޭ ޓީމަށް 10000 (ދިހަހާސް) ރުފިޔާގެ ފައިސާގެ އިނާމުވަނީ ހުށަހަޅާފައެވެ.